CASH GRANT, INAWAT DAGITI 4 P’s BENEFICIARIES

Cabugao, Ilocos Sur – Kalpasan ti pannakaited ti Cash Card kadagiti benepisiario ti Pantawid Pamilyang Pilipino Program (4 P’s) kadagiti 33 a barangays ti ili a Cabugao itay nabiit, naparuk-atan manen  babaen ti Department of Social Welfare and Development (DSWD) dagiti gatad nga awaten dagiti benepisiario ti 4 P’s  Members nga imatonan ti Municipal Social Welfare and Development (MSWDO)-LGU Cabugao  a kapartner ti Gobierno Nasional iti pannakaipatungpal daytoy a pro-poor program ditoy nga ili.

Iti aldaw ti Agosto 22, 2013, naipaay dagiti AR (Acknowledgement Receipt) kadagiti Grantees  tapno awatenda manipud iti natudingan nga establisimiento  a mangted kadagiti gatad nga awaten ti tunggal maysa.

Naangay ti ababa a programa sakbayna  iti Cabugao Cultural and Sports Complex, Brgy. Rizal, Cabugao, Ilocos Sur  sa naited dagiti AR’s ket pinalagipan ni MSWD  Officer Mrs. Lydia S. Gazmen dagiti umawat iti umisu a pannakayusar dagitoy a gatad ken ti panangannurotda kadagiti mainayon nga obligasionda iti pamiliada ken iti  komunidadda.

Nakikaysa met ni SB Member Dr. Carlito S. Pano, Committee Chair on Social Services kadaytoy a taripnong ket impeksana met ti agtultuloy latta a napintas a panangannurot dagiti benepisiario kadagiti alagaden nga ituyang ti linteg iti benepisioda.

Kimmablaaw ken nagyaman ni Mayor Edgardo “Ediboy” S. Cobangbang, Jr. ta matulongan manen dagiti umili babaen kadaytoy a programa ti Gobierno Nasional nga ipatungpal ti DSWD ken ti LGU.

Impeksa pay ti Ama ti Ili ti ragsakna   ta agtultuloy iti napintas a pannakaipatungpal ti programa ken ar-aramiden  dagiti maseknan a benepisiario ti obligasionda kadagiti maawatda.  Nagyaman pay ken kinablaawan ni Mayor Ediboy kadagiti Opisiales ti DSWD nga umay nangipagteng kadaytoy a dakkel a tulong a para kadagiti agkasapulan a pamilia iti programa a mangiyagpang ti kasasaad ti panagbiagda.

Nagpaay a Facilitator da Miss Aida S. Cueto,  4 P’s Focal Person, Municipal Link,  Miss Jessie Ann O. Tabut, Municipal Link-Cabugao ken dagiti MSWDO Staff and Personnel  iti pannakatarabay dagiti nagited ti AR sakbay  a mapan  awaten dagiti Beneficiaries dagiti gatad a para kadakuada. # (Web In-Action)