Cabugao, Ilocos Sur – Apaman a naibayog ti pagsignalan No. 3 ti PAG-ASA iti Bagyo Labuyo iti Ilocos a pakasakupan ti Probinsia ti Ilocos Sur, dagus a nangiparuar ti pammilin ni Mayor Edgardo “Ediboy” S. Cobangbang, Jr. iti imatang ti Pamilia-LGU ken iti sangapagilian a Cabugao, Ilocos Sur idi Agosto 12, 2013 iti panagsaganada a mangpasungad ti dumteng a kalamidad.
Pakabuklan ti pammilin ti Ama ti Ili iti panagtignay ti organisado a Municipal Disaster Risk Reduction Management Council (MDRRMC) iti LGU-Cabugao a kaaduan a pannakabagi ti LGU ken kadagiti Opisiales ti 33 a barangay ti Munisipalidad a kangrunaan a kakoordinarda ken katinnulongda iti panawen a marespondean ti insidente ti kalamidad iti barangay ken Poblasion.
Nagmalem a naaramid ti panangpasungad ti Bagyo Labuyo babaen iti puersa ti MDRRMC ket kaasi ti Apo a Namarsua, malaksid iti saggabassit a tudona ken panagkuykuyemna ket napaturay a napalabas ti bagyo a nangdidigra ti nakaro unay kadagiti kabangibang nga ili ken rehion iti pagilian.
Iti dayta a petsa, paset pay ti pammilin ni Mayor Ediboy ti panag-stand by dagiti ambulansia, lugan ti LGU a mabalin a pagarayat ti madangran/maibakuit nga umili no kaspangarigan agraman iti Payloader a madagdagus met a mangwada ti reggaay iti kalsada no kasta man ti mapasamak.
Kabayatanna, nakasagana met dagiti dadduma nga Opisina kas iti RHU-Municipal Health Office (24 Oras ti shifting duty-da), Municipal Police Station, Bureau of Fire Protection (BFP)-Cabugao nga addada iti asideg iti Munisipio nga ayan ti sentro ti MDRRMC no adda kasapulan para iti emerhensia a patauden ti Bagyo Labuyo.
Impakaammo ni Engr. Nestor B. Somera, pannakabagi ti MDRRMC a kankanayon a nakasagana ti grupoda a mangsagap kadagiti impormasion iti idadateng ti aniaman a kalamidad ken naka-intact dagiti kasapulan a lugan, rescuers, hotline a pagpakaammuan dagiti adda iti barangay no adda mapasamak a didigra iti uneg ti Munisipalidad.
Dagitoy nga aksion ken inisiatiba ket bunga ti natunos ken sistematiko a panagtignay dagiti maseknan a sanga ti Gobierno ken Opisina a mangarayat ken mangtulong iti asinoman a biktima/maapektaran ti kalamidad ditoy nga ili. # (Web In-Action)
No comments:
Post a Comment