Cabugao, Ilocos Sur – Naaramid ti pannakaited dagiti Cash Cards kadagiti kameng ti Pantawid Pamilyang Pilipino Program (4 P’s) Beneficiaries iti 33 a barangays ti ili a Cabugao, Ilocos Sur idi Agosto 13, 2013 iti Cabugao Cultural and Sports Complex, Brgy. Rizal, Cabugao, Ilocos Sur.
Inulit nga imbinsa ni Mrs. Lydia S. Gazmen, Municipal Social Welfare Officer ti MSWDO-Cabugao dagiti annuroten iti pannakasagrap ti Cash Card a maikanatad nga awaten ti tumunggal maysa.
Naawis a nangimatang ni Mayor Edgardo “Ediboy” S. Cobangbang, Jr. iti pannakaited dagiti Cash Card kadagiti kameng a nagrupo iti tunggal barangay. Iti mensahe ni Mayor Ediboy, kimmablaaw ken pinasingkedanna ti pannakasursuro dagiti kameng a mangprobitsar iti serbisio dagiti maseknan nga Ahensia a makaited ti tulong kadakuada kas iti Conditional Cash Transfer nga ited ti DSWD a kangrunaan a programa ti Gobierno Nasional kadagiti marigrigat a pamilia.
Impeksa pay ni Mayor Ediboy iti panagyamanna kadagiti pannakabagi ti DSWD ken Land Bank of the Philippines (LBP) iti pannakaited dagitoy a pagsayaatan kadagiti kailianna ta ammoda met ti agtungpal a situtulnog iti annuroten ken responsibilidadda a naituyang kas benepisiario kadaytoy a programa.
Nakikaysa met ni Vice Mayor Deogracias Jose Victorino H. “DJ” Savellano iti daytoy a taripnong ket impeksana met ti kablaaw ken panagyamanna iti pannakaited kenkuana ti gundaway nga agsarita para kadagiti kailianna ti Cabugao.
Umabot ti 654 a kameng ti naikkan ti Cash Card a manamnama nga usarenda ti panangalada iti Cash Grant iti kada dua a bulan. # (Web In-Action)
No comments:
Post a Comment