Cabugao, Ilocos Sur – Naangay iti Crop Cutting ti Reppa-ac Farmers Association iti naimulada a hybrid a pagay iti Learning Field-da nga aglawa iti 5,000 metro-kuadrado iti Brgy. Reppa-ac, Cabugao, Ilocos Sur.
Iti pannaki-amad ti Web In-Action idi Oktubre 10, 2013, imbatad ni Mr. Obas Bill Y. Baclig, FFS Coordinator a parte ti panagadalda iti panangusarda ti measurement gadget ket matakuatanda ti bilang ti maapit kadaytoy a minulaanda nupay saan pay a nagapas ti amin a dawa.
“Pagyamananmi unay ta napadasanmi ti kastoy a panagadal. Adu ti nasursuromi ket sapay koma ta mayallatiw met iti sabali a pagtatalonan,” inapresiar ni Kagawad Edward Castillo, maysa kadagiti Participants ti Farmer’s Field School.
“Pagyamananmi met iti DA-LGU kangrunaan ken ni Apo Mayor ta simmangpet dagitoy a programa a makatulong unay kadakami ditoy pagtatalonanmi,” insupusop met ni Mrs. Violy Savella, maysa pay a participant.
Ti FFS-Reppa-ac ket nagbuligan nga inyusuat ti LGU-Cabugao nga idauluan ni Mayor Edgardo “Ediboy” S. Cobangbang, Jr., ti OPAG-Ilocos Sur ken ti DA-RFU 1, San Fernando City, La Union tapno saanen a paudi dagiti mannalon ditoy Cabugao kadagiti agkabaruanan a teknolohia iti panagtalon a mangingato ti matgedan dagiti mayoridad nga umili. # (Web In-Action)
No comments:
Post a Comment