Wednesday, October 2, 2013

PANNAKAPAPINTAS TI MNR, PAGBULIGAN TI LGU KEN TI DPWH

Cabugao, Ilocos Sur – Iti pannakiuman ti Web In-Action ken ni MENRO Edgar S. Balangatan, AT, imbatadna a makikaysa metten ti DPWH 1st Engineering Office, Bantay, Ilocos Sur iti beautification and maintenance iti Main National Road a masakupan ti ili a Cabugao, Ilocos Sur partikular ti Cuancabal-Sagayaden Area.

Nangrugi idi Oktubre 1, 2013 a nagtignay ti DPWH nga idauluan ni Engr. Jun Paz idinto ta da Municipal Engineer Crescencio Formoso ken ni MENRO Edgar S. Balangatan iti mangibagi ti LGU-Cabugao.

Kadagiti napalabas a panagbagyona wenno panagtudona ti napigsa, nagtinnulong dagiti pannakabagi ti LGU ken ti DPWH a nangikkat ti naisullat iti highway crossing ti  Sitio Cabaruan tapno maalay-ayan ti mabunnong a danum.

Innayon ni Mr. Balangatan a kasapulan a mamantener ti pannakadalus ti agsumbangir nga abaga ti Kalsada Nasional nangruna iti pannaka-pruning dagiti agruyag a sanga ti kaykayo a posible a makaited ti desgrasia no dadduma.

Ti Cabugao, Ilocos Sur ket maysa kadagiti  naruay ti balikbayanna a bumisbisita iti tunggal napapateg nga aldaw ti tawen  ket insupusop ni Mr. Balangatan a  kasapulan a maisaganaan daytoy nga  umay manen a panagbabakasionda. # (Web In-Action)

No comments:

Post a Comment