Monday, October 14, 2013

DISTRIBUTION TI FRUIT TREE SEEDLINGS, MALMALPASEN

Cabugao, Ilocos Sur – Umaboten ti 27 a barangay ti ili a Cabugao, Ilocos Sur iti nawarasan ti Fruit Tree Seedlings babaen iti panangideliber ti lugan ti Munisipio ti Cabugao a tartarawidwidan dagiti pannakabagi ti Clean and Green Program nga imatonan ni MENRO Edgar S. Balangatan, AT.

Dagiti naiwaras a fruit tree seedlings ket iti coconut seedlings, guayabano, grafted mango ken kayawan. Mabenepisiaran ti amin a 33 a barangays ti ili a Cabugao, Ilocos Sur kadaytoy a rusuat.


Dagitoy a panagmula ti agbunga a kayo ket inrusuat ti Gobierno Probinsial nga idauluan ni Governor Ryan Luis V. Singson a kapartnerna ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken iti pannakikaysa ti  Ahensia ti Philippine Coconut Authority (PCA).

Naisangrat a maipakumit kadagiti Opisiales ti Barangay iti pannakaallawat, pannakaimula ken pannakataripato dagitoy a pagsayaatan tapno maipasigurado nga iti masakbayan ket agtan-ayda a mangited ti bunga a nayon a pagtaraon dagiti sapasap a mabenepisiaran.

Dagitoy pay laeng ti pakpakauna a gannuat iti panangipromot ti orchard iti barangay ditoy Cabugao tapno masulnitan dagiti agpukpukawen a pinuon dagitoy a kangrunaan a nasustansia a prutas, segun pay ken ni MENRO Edgar S. Balangatan, AT. # (Web In-Action)

No comments:

Post a Comment