Cabugao, Ilocos Sur – Iti pannakiuman iti Web In-Action idi Oktubre 9, 2013, imbatad ni Brgy. Captain Valentin S. Tuyor, Jr. a napabaro dagiti stall iti pagurayan ti lugan iti Kalsada Nasional a batog ti Cabugao South Central School babaen met laeng iti inisiatiba dagiti aglaklako. Kalikagumanda a napintas a mabuybuya ti pakaipanan dagiti lakoda nga inaldaw tapno ad-adda pay a maatrakar dagiti aggatang/agbibiahe malaksid ta naimas dagiti agduduma ti klasena a makan a nakadiaya ditoy a pagtagilakuan.
Innayon ni Bgry. Captain Tuyor a tintinnagan dagiti aglako babaen iti P10 nga inaldaw a pagbayadda agingga a maturposda a mabayadan ti naipaaramid a napintas a lamisaan a paglakuanda.
Dagitoy nga aksion ken inisiatiba ket napundar babaen iti kooperasion dagiti aglaklako ken dagiti Opisiales ti Brgy. Bonifacio ta malaksid nga agpaay a waiting shed dagitoy a puesto ket mangipaay met iti livelihood assistance kadagiti aglaklako ta manipud met laeng iti bigat agingga iti malem nga usarenda daytoy nga espasio a kukua ti DPWH, segun pay ken ni Kapitan Tuyor.# (Web In-Action)
No comments:
Post a Comment