Friday, May 9, 2014

MEDICAL MISSION, NAISAGUT ITI BRGY. SABANG

Cabugao, Ilocos Sur – Naisagut ti maysa a  Medical Mission kadagiti lumugar iti Barangay Sabang, Cabugao, Ilocos Sur babaen iti panangtarabay ti Local Government Unit (LGU)-Cabugao nga idaluan ni Mayor Edgardo “Ediboy” S. Cobangbang, Jr.

Nasapa a nagturong dagiti nagpaagas iti Multipurpose Hall ti nasao a barangay ket madagdagus met nga inrehistro dagiti RHU Personnel a nagserbi kadagiti naituding a lamisaan.
Naigannuat  ti Medical Mission iti Mayo 9, 2014 babaen iti panangipaay ti MHO-RHU  nga imatonan  ni Dr. Bernardino M. De Gracia, OIC Municipal Health Officer ti LGU-Cabugao kasta metten  iti tulong ti  Grupo da  Dr. Kathleen Cobangbang-Castro ken ni  Dr. Joy Lozano. 


Iti pannaki-amad ti Web In-Action kadagiti Medical Staff and Personnel a nangtarawidwid iti panagagas, naiparehistro  dagiti nagpaagas iti benneg ti  Medical (saan unay a nadagsen a sakit)  ken naiwayat ti   Circumcision dagiti ubbing.

Impeksa pay  ni Brgy. Captain Atilano C. Saquiton iti Barangay Sabang iti  nalaus a panagyamanda ken kadagiti kalugaranna  kadagiti Opisiales ti Gobierno Lokal ken kadagiti Mangngagas a nagserbi gapu iti aglaplapusanan a naitulongda kadagiti kabaranggayanna. # (Web In-Action)

No comments:

Post a Comment