Cabugao, Ilocos Sur – Naangay ti Monthly Meeting dagiti Barangay Nutrition Scholars (BNS) iti Munisipalidad ti Cabugao, Ilocos Sur iti Mayo 6, 2014 a nagatendaran dagiti BNS iti 33 a barangay ti ili iti Municipal Building.
Naaramid ti miting maibasar iti pakabuklan ti Nutrition Capability Enhancement Training.
Kangrunaan pay a nataming ket iti update ti datos dagiti klienteda iti barangay, pannakairingpas dagiti report/papeles (Forms) babaen iti workshop dagiti maseknan a BNS iti tunggal masakupanda a barangay.
Kaaduan a BNS a nagatendar ket impeksada nga iti naimpapusuan a panagserbi kadagiti agkasapulan nga umili ket kaipapananna met ti pannakatun-oy ti ragsakda a makatulong malaksid iti material a gunggona. Dinakamatda ti natunos a panagtrabahoda a katinnulong ti Gobierno Lokal a mangpasayaat/mangiwanwan iti pannakaragpat iti agtultuloy a salun-at ti kaaduan.
Naballigi pay a napagpapatangan dagiti pakaseknan ti tunggal BNS babaen iti panangrienda ti miting ni Mrs. Joenah G. Sevilleja, Municipal Nutrition Action Officer-Designate kasta met ni Ms. Melanie Saquiton, JO, a timmulong kenkuana.
Ti pannakaisaknap iti napintas a serbisio ti nutrision kadagiti ubbing ket maysa a prayoridad a programa ti LGU-Cabugao nga idauluan ni Mayor Edgardo “Ediboy” S. Cobangbang, Jr., Chairman, Municipal Nutrition Council Committee tapno agtultuloy a mamantener ti salun-at dagiti agtan-ay nga ubbing ken natalged a kasasaad dagiti inna kas pundasion iti natibker a pamilia iti kagimongan. # (Web In-Action)
No comments:
Post a Comment