Cabugao, Ilocos Sur – Naangay ti System Management Committee Meeting (SMC), kangrunaan a Komite a katinnulong ti Gaco National Irrigation System a mangtarawidwid iti Operation and Maintenance iti maserbisyuan a barangay iti ili ti Cabugao, Ilocos Sur iti Mayo 7, 2014 iti Brgy. Hall, Barangay Cuantacla, Cabugao, Ilocos Sur.
Nagatendar dagiti Opisiales dagiti tallo nga umuna a nabuangay nga Irrigator’s Association (IA) kabayatan iti pannakatarimaan dagiti pasilidad ken istraktura iti nasao a pagpadanuman a kas iti Magarang Farmer’s Irrigators Association, Cuancabal-Nangaraban IA ken Rizal-Baclig IA.
Nangipaay ti Welcome Remarks ni Municipal Agriculturist Zenaida S. Andrada ti LGU-Cabugao a naawis a nagatendar iti naangay a programa. Sakbayna, naaramid ti Organizational Meeting ti SMC a nakapilian dagiti sumaganad a mangrienda itoy a Komite.
Chairman – Engr. Dominador Mangaoang; Vice President – Elpidio Sonido; Secretary – Ronald Verzola ken agbalin a miembro dagiti pannakabagi dagiti IA Presidents/ Sector ken Ahensia a kas iti NIA, IA, LGU ken Line Agencies.
Naawis ni Mayor Edgardo “Ediboy” S. Cobangbang, Jr. a nangipaay ti Mensahena sakbay a naitultuloy a nataming dagiti Agenda daytoy maysa nga aldaw a panagmiting ti SMC. Kimmablaaw ni Mayor Ediboy kadagiti amin a nagatendar iti nasao a miting. Dinakamat ti Ama ti Ili iti pateg daytoy a dakkel a proyekto a maited kadagiti mannalon a mayoridad a kameng dagiti komunidad iti ili. Inggunamgunamna iti napintas koma a pannakikaysa dagiti Irrigator’s Association iti NIA a mangtaripato kadagiti nakongkreto a pasilidad ken mangannurot kadagiti maiyetnag a polisa ti NIA iti Operation ken Mentenansia daytoy a pagpadanuman.
Innayon ni Mayor Ediboy a saan a mapaay ti panggep ti NIA a nangited kadaytoy a nagdakkel a proyekto kadagiti umili ta babaen iti pannakatulong kadakuada iti panagtalonda ket dumakkel ti masapulanda a mangpapigsa ti “purchasing power-da” nga agresulta iti panagsayaat ti ekonomia ti ili. Maragsakan ti Alkalde Munisipal ta isudanto met laeng nga umili iti maisagut ta iti agtultuloy a panagdur-as ti ili ket maited kadakuada dagiti kasapulan a serbisio a mangpasayaat pay ti kasasaadda. Insupusopna pay a sipapalubos a mangallawat kadagiti proyekto a pakaisagutan dagiti umili ket dinakamatna pay dagiti proyekto ti irigasion idiay Brgy. Turod Patac, Brgy. Catucdaan ken Brgy. Aragan a mangipaay iti supisiente a danum ken nadisiplina a pannakausar daytoy babaen iti panangtarabay ti Ahensia ti NIA ken ti LGU.
Naisaganad ti pannakaibinsa ti Accomplishment Report & Other Technical Plans ti NIA-Gaco NIS iti panagmiting ti SMC iti panangidaulo ni Engr. Mangaoang.
Nakikaysa met ni Engr. Adriano F. Amano, Manager, NIA-Irrigation Management Office (IMO), Ilocos Sur, Barangay Captain Dencio Sonido ti Barangay Cuantacla, MPDC Florante Jara, Municipal Engineer Crescencio Formoso, NIA-Regional Staff ken NIA-Gaco National Irrigation System Staff. Agtultuloy ti miting ti SMC agingga iti oras ti alas singko ti malem iti dayta nga aldaw. # (Web In-Action)
No comments:
Post a Comment