Cabugao, Ilocos Sur – Iti Meeting ti DA-LGU-Cabugao Staff iti 2014 nga idauluan ni Municipal Agriculturist Zenaida S. Andrada kada bigat iti Lunes, napagnanamingan a mapagtalinaed ken maitultuloy a maipatungpal ti serbisioda kadagiti barangay a destino ti tunggal Personnel/Technologist iti nasao a Departamento ti LGU-Cabugao.
Iti biang met dagiti asosasion dagiti mannalon ken mangngalap, maibatay iti pannakiam-amad ti Web In-Action kadakuada, napintas unay kadakuada daytoy a parupa ti serbisio nga itultuloy ti nasao nga opisina tapno maipamaysada a maammuan dagiti pakaseknanda a mannalon a saanda a maitugot iti papanda iti opisinada gapu ta kasapulan met a maaktualanda ti kasasaad dayta a pakaseknan iti barangayda.
Imbatad ti dadduma a Presidente ti asosasion a ditoy ita a mariknada ti kinaepektibo ti maysa a Teknisian a mangipatungpal ti programa iti Agrikultura agsipud ta kadakuada ket ti maysa nga “Extensionist” ket kasapulan a masansan a makilangen kadagiti mannalon a makasapul iti pannarabayda.
Innayon pay dagiti mannalon ken mangngalap nga epektibo dagiti mairubuat a programa ken proyekto ti DA-LGU a mangitag-ay ti kasasaad dagiti klienteda a mannalon ken mangngalap tapno mayagpang ti serbisio a kalikaguman a tun-oyen ti Gobierno Munisipal nga idauluan ni Mayor Edgardo “Ediboy” S. Cobangbang, Jr. para kadagiti umili.
Daytoy nga inisiatiba dagiti DA-LGU Personnel ket maysa a wagas iti panangidanonda iti napateg a serbisio para iti sektor dagiti mannalon ken mangngalap. # (Web Situational Report)
No comments:
Post a Comment