Friday, September 19, 2014

116th ANNIVERSARY TI PANNAKAYANAK NI JOSEFA LLANES ESCODA, MASELEBRARAN

Cabugao, Ilocos Sur – Selebraran ita nga aldaw, Setiembre 19 ti “Girl Scout Day”  ti pageskuelaan ti Cabugao South Central School nga idauluan ni Mrs. Melvi S. Sajonia, Principal II, iti pannakayanak ni Josefa Llanes Escoda, Pundador ti Girl Scouts of the Philippines (GSP).

Naaramid ti ababa a programa iti sanguanan ti Monumento ni Escoda iti nasao a pagadalan a nagidatonan dagiti Girl Scout (Twinklers, Stars, Juniors)  iti sabsabong kas tanda iti pananglagip/panangrespeto kadaytoy Ilokana a Pundador ti GSP.

Indauluan met ni Mrs. Sajonia dagiti GSP Members ken GSP Troop Leaders a nangimatang iti nasao a  seremonia ti panagselebrar. Kalpasan ti nasao a programa, naangay ti aktibidades dagiti Girl Scout kas iti Cook-out and other GS Activities a pakaisuruan pay kadagiti miembros iti umisu a panagdaldalus, panagipauneg ti taraon ken panangisagana iti kasapulanda ken iti pagtaenganda.

Segun ken ni Mrs. Sajonia, nupay Setiembre 20, ti pannakayanak ni Josefa Llanes Escoda ket selebrarandan a nasapsapa ta adda pay klase dagiti ubbing. Innayonna nga School Celebration daytoy a mapasamak kas aramiden dagiti dadduma a pageskuelaan ti Cabugao DepEd District ken maaramidto  ti District Celebration inton Setiembre 21, 2014 ditoy Poblasion.

Naipunganay  daytoy a panagselebrar babaen iti bileg ti Presidential Proclamation 1214 ken adda ti National Headquarters ti GSP iti Padre Faura, Manila.

Ni Mrs. Melvi S. Sajonia ket agdama  a Northern Luzon Diploma Trainer idinto ta ni SBM Dr. Jemaima S. Tan -Yee ti  agdama a GSP District Committee Chairperson. # (Web In-Action)

No comments:

Post a Comment