Monday, September 8, 2014

FFS-BALIW-QUEZON, HYBRID KEN INBRED TI MAIPAMAYSA

Cabugao, Ilocos Sur – Paset ti pannakaidur-as ti Rice Sufficiency Program ti LGU-Cabugao ti pannakaipasdek iti Demo-Farm iti adu a disso ti Munisipalidad, kas panagkuna ni Municipal Rice Program Coordinator Nereo S. Daproza tapno sapasap a makasagrap dagiti umili/mannalon  iti napintas a programa ti Agrikultura iti Munisipio.

Iti biang ti Hybrid ken Inbred, maar-aramid  met ita ti panagbasa dagiti mannalon iti Sitio Baliw, Barangay Quezon, Cabugao, Ilocos Sur iti Farmers Field School on Adaptability Trial of Hybrid and Inbred Varieties babaen iti panangisayangkat ti DA-LGU Cabugao ken ti DA-RFO 1, San Fernando City, La Union.

Dagiti naimula a klase ti pagay ket Ryan Rice, SL-18, SL-8, NSIC Rc 238, Green Super Rice, NSIC Rc 122,  NSIC Rc 222, H-64 Hybrid, Bigante Plus Hybrid a paset ti aktual a pagibasaran ti adalda iti 18 a lawas a panagbasada iti Palay Check, IPM ken ti  AESA a kangrunaan a pakabuklan ti maiyadal. Tunggal aldaw ti Mierkoles ti kada lawas ti panagbasada kalpasan a sukimatenda ti minulaanda a 5,000 Metro-Kuadrado a Learning Field-da a masarakan ditoy met laeng a disso ti pagtatalonan.

Innayon ni Mr. Daproza a pagsusublatenda a pasdekan ti demo-farm iti amin a disso iti pagtatalonan tapno  maidanon ti kabaruanan a Teknolohia/serbisio  iti panagmula ti pagay tapno maapresiar dagiti mannalon  ket tuladenda a  mangingato ti apitda ken matgedanda.

Ti Sitio Baliw, Barangay Quezon  ket maysa kadagiti Sitio ti Munisipalidad ti Cabugao a pakaiwaywayatan ti programa ti Agrikultura ti Munisipio iti agdama. # (Web In-Action)

No comments:

Post a Comment