Cabugao, Ilocos Sur – Nagleppas ti panangidanon dagiti Medical Personnel ti Rural Health Unit (RHU)-Cabugao nga idauluan da Dr. Bernardino M. De Gracia, OIC Municipal Health Officer ken ni Public Health Nurse Mrs. Janet Sison iti serbisio ti panagbakuna iti “Anti-Measles Rubella with Oral Polio Vaccine” kadagiti ubbing iti 33 a barangay ti ili a Cabugao, Ilocos Sur ita nga aldaw ti Setiembre 24, 2014.
Daytoy a nasaknap a panagbakuna ket maikonsentrar iti panglapped ti sakit a Kamuras, Polio, Neumonia (adda uyekna a pugiit), segun iti RHU Staff. Nabakunaan dagiti ubbing iti kada barangay ti ili a Cabugao tapno maantisiparan ti panagraira ti virus iti nasao a sakit.
Kabayatanna, pinasingkedan ni Ms. Jeannette Garcia, Public Health Sanitary Inspector iti LGU-Cabugao a napukawen ti insidente ti Dengue kasta met ti sakit a Meningococcemia maigapu ta naadalanen dagiti umili iti naan-anay a panangliklik iti pakaigapuan ti nasao a sakit babaen iti agtultuloy a panangtarabay ti LGU-Cabugao ken ti Departamento ti Salun-at (DOH) kadakuada.
Inulit ni Mrs. Garcia dagiti nasamay nga addang a pinangparmekda iti Dengue Occurrence kas iti sumaganad:
1. Iraman dagiti RHU Personnel a naibagbaga iti kada pasienteda iti inaldaw iti nasken nga aramidenda tapno maliklikan ti pannakakagat ti agranggas a lamok ken no kasano a paksiaten ida.
2. Pannakaiwayat ti nasaknap nga “Oplan Taob” a kangrunan a katinnulong ti DOH-LGU, MDRRMC ken dagiti Opisiales ti Konseho iti barangay ti ili.
3. Nakoordinar dagiti ospital pribado/pampubliko iti uneg ti ili kasta met kadagiti kadarapat nga ili tapno ti maseknan a kinapet ti dengue nga agnaed ditoy nga ili ket matulongan pay a mangsaranget kadayta a sakit.
4. Nawarasan ti amin a household ti barangay iti OV-Trap tapno masigud a makeltay ti itlog ti lamok a mangpataud ti dengue no mapalusposan a dumakkel daytoy.
5. Maaramat pay ti de-fogging iti apektado a disso no nasaknapen ti panagwaras dagita a makadangran a lamok.
6. Agtultuloy a kooperasion ti tunggal Ahensia a manglapped iti itataud daytoy a sakit. # (Web In-Action)
No comments:
Post a Comment