Tuesday, January 27, 2015

ACTION PLAN 2015 TI DA-LGU, NAPASINGKEDAN

Cabugao, Ilocos Sur – Nagmiting ti sibubukel nga Staff & Personnel ti DA-LGU Cabugao nga idauluan ni Municipal Agriculturist Zenaida S. Andrada para iti assessment-da iti kallabes a Tawen 2014  tapno maiplastarda  dagiti planoda para iti Tawen 2015 kadagiti mannalon a kangrunaan a parserbisyuanda.

Segun ken ni MA Andrada, innayonna a sinublianda a tinaming ti nagbambanaganen  dagiti inggannuatda a proyekto/programa ken aktibidadesda iti Tawen 2014 ket aniaman a naarisitda  a nagkuranganda  ket dayta met ti papigsaenda iti Tawen 2015-agsipud ta kaaduan kadagitoy ti agtultuloy a programa a pagkamkammayetan nga ipatungpal ti LGU-Cabugao ken ti DA-RFO 1 tapno agtultuloy a sumayaat ti kasasaad dagiti mannalon iti Munisipalidad.

Nasurnadan pay ti kasasaad ti tunggal  Banner Program dagiti Technologist kadagiti destinoda a barangay ket naisingasing dagiti pangpasayaat pay iti maidiaya a serbisio kadagiti mannalon babaen iti ragup a desision ti Departamento ti DA-LGU ditoy Munisipio.

Insupusop pay ni Mrs. Andrada a dagitoy nga inisiatibada ket panamagsagana kadagiti report-da para iti Opisina ti Mayor, OPAG-Ilocos Sur ken iti Regional Field Office (RFO) 1, San Fernando City, La Union para iti assessment ken planning.

Nakikaysa met ni MENRO-Designate Edgar S. Balangatan, AT iti nasao a panagmiting ti DA-LGU Cabugao tapno mairagpinna  met dagiti pakaseknanna iti departamento nga itaktakderanna. # (Web In-Action)

No comments:

Post a Comment