Monday, January 26, 2015

SOLID WASTE KEN CLEAN AND GREEN PROGRAM 2015 , MAMONITOR

Cabugao, Ilocos Sur – Segun ken ni MENRO Edgar S. Balangatan, AT, nga agpadpada  a monitorenda iti maipapan iti  Solid Waste ken iti Clean and Green a programa ti Munisipio  iti pannakapasayaat ti aglawlaw nangruna iti Munisipalidad ti Cabugao.

Kanaig daytoy, imbaga ni MENRO Balangatan nga agtultuloy  a ka-koordinarda ti Management ti Luzon Green Art Technology, Inc. (LGA Tech., Inc.) ti kompania a nangkontrata iti pannakaidalimanek ti basura iti ili. 

Sakbayna, naangay ti miting iti nagbaetan ti kompania ken ti LGU-Cabugao ket nangruna a natratar idi kadayta a miting ket iti implementasion ken natalged a pannakaiserra/ Rehabilitation  Plan ti Dumpsite babaen  iti DENR; Mechanics on the Disposal/Marketing iti naprodukto nga Organic Fertilizer kasta met iti resulta a nagun-od ti kompania iti Bureau of Soils and Water Management (BSWM). 

Nagatendar idi kadaytoy a miting dagiti pannakabagi iti nadumaduma a Departamento  a kas iti GSO, Budget, Komite ti Environment ti SB; DA-LGU, Engineering, MPDC ken iti MENRO.

Insupusop ni MENRO Balangatan a saan nga agsina a pakaseknan ti Munisipio iti maipapan iti Solid Waste Management ken iti Clean and Green iti intero a Munisipalidad  ket insingasingna pay a maipakat met iti agtultuloy a panagdaldalus iti sakup ti EEA Road-Bessang to Caellayan a madalanan no mapanka iti Ecology Center ken mamantener koma ti kinadalus iti agsumbangir ti nadakamat a  kalsada.

Kasta met nga agtultuloy a maipromot koma iti panagdaldalus iti kalsada ken  arubayan kadagiti balbalay kadagiti barangay babaen iti itutulong a  panangmonitor dagiti Opisiales ti Barangay a kabinnulig ti Munisipio a mangitandudo kadagitoy nga agdama a programa iti Tawen 2015, segun pay ken ni MENRO Balangatan. 

Dagitoy nga aksion ken inisiatiba ket bunga iti napintas a koordinasion dagiti Opisina ken Ahensia a maseknan ken adda iti salinong  ti LGU-Cabugao nga idauluan ni Mayor Edgardo “Ediboy” S. Cobangbang, Jr. para iti pannakaitandudo dagiti proyekto/aktibidad  nga agtultuloy a mangpasayaat iti aglawlaw ti Munisipalidad. # (Web Situational Report)

No comments:

Post a Comment