Thursday, January 29, 2015

NAISAPA A NAIMULA, AGDUDUMA A NATENG, PAGSAYAATAN TI SAPASAP

Cabugao, Ilocos Sur – Maibatay iti rekord ti High Value Commercial Development Program (HVCDP)-DA LGU Cabugao nga imatonan ni Mrs. Ester P. Aguimbag, AT, umab-abot iti nasurok a duagasut nga ektaria iti namulaan ti nateng nangrugi iti Tawen 2014 ken dadduma ket maapitdan iti Tawen 2015.

Innayon ni Mrs. Aguimbag nga adda agduduma ti klasena  a kangrunaan a naimula ken  umabot iti 700  a bilang ti mannalon/vegetable growers a nagmula  kas iti upo (tabungaw); paria; kamatis, tarong, okra, stringbeans, karabasa, Finger Pepper; Bell Pepper; Sweet Pepper; lasona, bawang, mungbean (balatong) ken kamote. Maibilang pay ditoy ti legume (mani) ken iti sandia a sakupen dagiti cash crops a karaman iti HVCDP Category.

Dagitoy ket naimula iti nadumaduma a barangay iti ili nupay iti tabako ken mais iti kaaduan a bilang ti  naimula ita a Cropping Season (Dry Season 2014-2015).

Insupusop ni Mrs. Aguimbag a dagitoy nga agnatnateng iti kameng ti asosasion ti Cabugao Vegetable Growers and Producers Association ken ti dadduma ket dati nga agmulmula uray iti off-season type (deretso) a panagpatanoran ti nateng.

Kabayatanna,  kaaduan kadagiti kameng ti Cabugao Vegetable Growers and Producers Associaton nga idauluan ni Mr. Armando Azcueta ti nagisapa met iti mulada ngem nagduduma ti klase ti nateng nga immulada tapno maliklikan iti mapasamak  nga  “oversupply” iti Merkado a mangipababa ti presio.

Dagitoy nga inisiatiba ket resulta iti agtultuloy a panangtarabay ti Gobierno Munisipal nga idauluan ni  Mayor Edgardo “Ediboy” S. Cobangbang, Jr. kadagiti agmulmula ti nateng nangruna iti pannakatulong dagiti asosasion kadagiti barangay tapno adda latta mainayon iti pagtaraonda  a kasapulan ti nasalun-at nga umili. # (Web In-Action)

No comments:

Post a Comment