Cabugao, Ilocos Sur – Iti maikatlo nga aldaw (Disiembre 3, 2015) a pannakaaramid dagiti Games iti 2015 Ilocos Sur Division Sports Competition ket naregget ti risiris dagiti Team a nakaeskediul pay laeng iti salip ti lima a Unit (Unit 1 to Unit V).
Nausar dagiti pasilidad ti Sports iti Cabugao District Athletic Oval (Freedom Park), Social Hall ti Cabugao South Central School, Covered Court ti Barangay Bonifacio, Cabugao Central Park (CCP), Cabugao Institute Ground ken iti Cabugao Cultural and Sports Complex ti Barangay Rizal iti pannakaaramid dagiti ay-ayam.
Agtultuloy met ti ipapan pannakitinnarabay dagiti Opisiales Lokal nga idauluan ni Mayor Edgardo “Ediboy” S. Cobangbang, Jr. iti Cabugao Athletic Oval ken panagmonitor ni SBM Atty. Bryan Jett S. Pano, Committee Chairman on Sports kadagiti pagay-ayaman.
Naregget met dagiti Pannakabagi ti Linteg (PNP-Cabugao ken ti BFP-Cabugao), BPATS/Barangay Tanod/Public Safety (Blue Boys) nga agrekrekurida iti uneg ken agiwardas ti Trapiko iti National Highway kasta pay kadagiti First Aide a buklen dagiti Nurses (RN-Heals), MDRRMC (Wasar) Team ken dagiti Ambulansia ti Munisipio a nakadeploy iti game area (Freedom Park).
Naregta latta met dagiti Clerk of Course/Recorder kasta pay dagiti Announcer/Presentor iti School Stage a mangipakpakaammo iti pagdurdur-asan ti paay-ayam, panangiyanunsio ti panagsagana dagiti sumaruno nga agsalip a Unit ken dagiti nangatiw a Unit Team kalpasanna, panawagan iti pakaseknan ti ay-ayam, dagiti Atleta ken agraman pay dagiti agbuybuya.
Kabayatanna, naipakaammon dagiti nangabak a Unit Team kadagiti sumagmamano a naileppas nga event ken maisarsaruno a maammuan dagiti agkampeon iti dadduma pay nga event nangruna iti Ball Games.
Madesisionan pay laeng ti resulta dagiti dadduma nga events iti maudi nga aldaw (Disiembre 4, 2015) iti paay-ayam ken maammuan dagiti agballigi a Unit Team iti benneg ti Sekundaria ken ti Elementaria ita a Tawen 2015. # (Web In-Action)
No comments:
Post a Comment