Cabugao, Ilocos Sur – Kangrunaan a gay-at ti Department of Agriculture (DA)-Regional Field Office 1, San Fernando City, La Union ken iti LGU-Cabugao babaen iti panangipatungpal ti DA-LGU iti pannakatulong dagiti Corn Farmers iti pannakaited kadakuada iti rehab a bukel ti mais (GS140 Asian Hybrid Corn) gapu ta naapektaranda iti pannakasaplitda iti bagyo iti kallabes.
Impakaammo ni Acting Municipal Agriculturist Robert S. Savella nga ited ti DA-RFO 1 ken ti OPAG-Ilocos Sur ti kakastoy ti klasena a bukel ti mais nga imula ti 100 a bilang ti mannalon a makasakup iti 50 ektaria a pakaimulaanna kadaytoy a Main Crop 2015-2016 ket maipangruna pay a maipamaysa iti panagmula ti hybrid a mais kalaksidan dagiti agmula met iti Tabako, Pagay, Nateng ken dadduma pay a Cash Crops.
Kanaig daytoy, innayon ni Mr. Savella a naaramiden ti Farmers Field School (Corn Category) kadagiti mannalon iti kallabes ket naiyadal dagiti sumaganad ti Topiko: Ecosystem-wise; Targeting Zero Chemical Use; Establish Equilibrium Level of Insect Pests and Natural Enemies ket addan pamalpalatpatanda iti produktibo a panagmula kadaytoy a nasao a cash crop.
Insupusop ti Acting MA a babaen kadagitoy a maiwayat a wagas/estratehia ket agresulta iti nangato a produksion, bassit a magastos ken natalged nga aglawlaw dagiti mannalon. # (Web In-Action)
No comments:
Post a Comment