Cabugao, Ilocos Sur – Agtultuloy a maaramid ti panagdaldalus/panagpapintas ti buya iti aglawlaw babaen iti panangiyusuat dagiti pannakabagi ti Munisipio kabayatan ti iyaasideg ti Paskua 2015 a panagsangpet pay dagiti Bakasionista, Balikbayan ken Turista ditoy ili a Cabugao, Ilocos Sur.
Segun ken ni MENRO Edgar S. Balangatan, kaduana da Mr. Richard Pula ken ni Mr. Donnel Peralta a mangtartarawidwid kadagiti LGU Personnel nga agtitinnulong ken agtultuloy nga agdalus kadagiti pampubliko a disso kas iti Parke, Plaza, Government Center, sango ti NISTC Public Market, Food Court ken ti National/Provincial Highway tapno agtultuloy a napintas ti buya ti aglawlaw.
Kabayatanna, naiplastaren ken maar-aramiden dagiti mayannatup a dekorasion kas iti Belen, Lights, Lanterns a para iti pannakaselebrar ti Paskua 2015 iti biang ti Munisipio kadagiti umisu a pakaipananda kangrunaan iti ikub ti Municipal Garden iti sango ti Munisipio (Presidencia) kasta metten kadagiti pagtaengan ken establisimiento ti negosio iti igid ti kalsada ti Poblasion.
Manamnama nga iti napintas a kooperasion dagiti pannakabagi ti LGU-Cabugao a mangirugi a mangirusat kadagitoy a tradision ket naballigi latta ti pagbanagan dagiti trabaho ken programa a mailunsad iti salinong ti Gobierno Lokal ti ili a Cabugao a para iti pannakaisagana dagiti pampubliko a pasilidades tapno maikkan ti naan-anay a kaipapanan para iti selebrasion ti Paskua 2015. # (Web Situational Report)
No comments:
Post a Comment