Monday, December 28, 2015

PASKUA 2015, NARAMBAK KEN NATALNA!

Cabugao, Ilocos Sur – Narambak ti panagselebrar dagiti umili ti Cabugao, Ilocos Sur iti Paskua 2015 partikular kadagiti Aldaw ti Disiembre 24 ken 25, 2015 a kangrunaan a maselselebraran babaen iti sapasap a panagrambak iti nagduduma nga aktibidades a kas iti panag-reunion, panagtitipon/panagiinniliw  dagiti agkakabagian, panagpasiar iti sabali a lugar, panagpiknik kadagiti beaches ken resorts iti ili ken dadduma pay a kapadana  a kannawidan a mangipakita  iti naiget  a panagselebrar iti tradision ti Paskua a selebrasion ti  pannakaipasngay ti Mannubbot iti Sangkataw-an.

Idi malem ti Disiembre 23, 2015, narambakan ti Christmas Program ti Pamilia-LGU ti Cabugao babaen iti panagrambak/panaglalanglang dagiti empleado ken Opisiales ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti Cabugao Cultural and Sports Complex, Brgy. Rizal, Cabugao, Ilocos Sur.

Kabayatanna, iti “Rambak Kaaldawan Paskua” nga inggannuat ti Cabugao Catholic Church ket nakulminar babaen iti “Misa Rabii” (Midnight Mass) babaen iti panangidaulo ti LGU Cabugao ken ti Parish Pastoral Council.

Iti Disiembre 25, 2015 a “Kaaldawan ti Paskua”, naangay met  ti Misa iti 6:30 A.M. nga indauluan ti Apostleship of Prayer, Mother Butler’s Mission Guild ken ti Brgy. Bonifacio idinto nga indauluan met ti Parish Finance Council, Religious Organizations ken ti Brgy. Baclig ti simmaganad pay a Misa.

Kanaig daytoy, maibatay iti rekord ti Municipal Police Station-Cabugao nga idauluan ni PCI Ramil A. Llarenas, Chief of Police, imbatadna nga awan ti madi a napaspasamak kadagiti barangay ken iti Poblasion ket natalinaay ken naragsak ti panagselebrar  ti Paskua 2015 iti intero a Munisipalidad ti Cabugao. # (Web Situational Report)

No comments:

Post a Comment