Cabugao, Ilocos Sur –Nakasagana ita nga agtignay ti puersa ti Cabugao Rescue Team-Municipal Disaster Risk Reduction and Management Council (MDRRMC) nga idauluan ni Mayor Edgardo “Ediboy” S. Cobangbang, Jr., Chairperson ken imatonan ni MDRRMC Officer Engr. Nestor B. Somera no inkaso a dumteng ti kalamidad ken insidente. Kasta met iti panangisaganada iti Operation Center ken kasapulanda a mausar ditoy Munisipio no kontaken dagiti natudingan a katinnulongda kadagiti calamity prone areas iti Barangay ken Poblasion babaen iti Hot Lines.
Daytoy a panagsagana ket maiturong iti bigla nga isusungad dagiti kalamidad/insidente kas iti bagyo, nakaro a tudtudo, layus, tikag, uram, desgrasia ken kanaigna a didigra iti masungad a bulbulan no adda man.
Kabayatanna, kankanayon a komendaran ni Mayor Ediboy iti naindaklan nga akem daytoy a sanga ti LGU.
Gapu itoy, paset ti pannakapatibker daytoy a Konseho iti pannaka-update dagiti mangbukbukel ti Skeletal Force ken pannakainayon dagiti matalek a kameng a mangpapigsa ti grupoda nga agtarabay iti panawen ti kalamidad.
Iti pannakiuman ti Web In-Action itay nabiit, imbatad ni Engr. Nestor B. Somera a malaksid iti panangalertoda kadagiti kakaduada a mangbukel ti MDRRMC iti Munisipio nga agmobilisar/agmonitor iti aw-away agingga iti Poblasion no dumteng ti kalamidad, aramidenda ti naan-anay a pannaki-koordinar kadagiti dadduma a Departamento ti Opisina ti LGU kas iti MSWDO, PNP, BFP, BDRRMC ken ti MHO a kaduada a maseknan no dumteng ti kalamidad tapno napigpigsa ti panagtignayda a mangaksion kadagiti pakaseknan dagiti umili nagruna kadagiti barbarangay.
Nupay kasta, mairamraman met latta ti MDRRMC-Cabugao a maikkan iti pammigbig iti gapuanan ken pannakitinnulongda iti naballigi a pannakaipatungpal ti akemda kadagiti kallabes a tawen a timmaud dagiti kalamidad.
Insupusop ni Engr. Somera dagiti napalabas a gapuanan ken aramidenda iti masanguanan nangruna iti bulan ti Hulio 2016 a pannakaselebrar ti “National Disaster Awareness Month” kas iti sumaganad:
1.Maangayto ti “Rescue March” iti amin a sanga ti MDRRMC ti Ilocos Sur idiay Vigan City inton Hulio 5, 2016.
2.Mangrugi iti Hulio 2016, 24 oras a nakaalerto ken ag-duty dagiti kameng ti rescue team (24/7) iti kada lawas kas panagsagana iti idadateng ti “La Ninia” ken dagiti Tropical Storm.
3.Naaramid ti Earthquake Drill ti Cabugao Rescue Team idi Hunio 22, 2016 kadagiti pageskuelaan iti UCCP; Cabugao National High School ken ti Cabugao North Central School kas pangannurot iti sangkapagilian a pannakaangay ti “2nd # Pagyanig Challenge” a programa ti DILG kadagiti LGUs.
4.Pannakapapigsa ti IEC (Information, Education and Communication) nga aspeto ti panagarayat babaen iti pannakausar dagiti Mobile Phones; Gadgets; Hotlines; Powerpoint; ken Reminders Board.
Innayon pay ni Engr. Somera a papigsaenda latta ti “collaboration” ti MDRRMC; RHU; PNP; BFP ken ti Cabugao Rescue Team ta dagitoy iti kankanayon nga agkakadua/agtitinnulong no adda insidente ken kalamidad nga aksionanda.
Dagitoy nga inisiatiba ket gubuayen ti nasapa a panagsagana iti panawen ti emerhensia tapno maprotektaran ken maalay-ayan ti epekto dagiti dumteng a kalamidad. # (Web In-Action)
No comments:
Post a Comment