Thursday, January 12, 2017

ACTION PLAN 2017 TI DA-LGU, MAIPAKAT

Cabugao, Ilocos Sur – Nagmitingen  ti sibubukel nga Staff & Personnel ti DA-LGU Cabugao nga idauluan ni  Municipal Agriculturist Robert S. Savella para iti assessment-da iti kallabes a Tawen 2016  tapno mabukelda  dagiti planoda para iti Tawen 2017 kadagiti mannalon a kangrunaan ken mangngalap  a klienteda.

Segun ken ni MA Savella, innayonna a sinubliananda a tinaming ti nagbambanagan  dagiti inggannuatda a proyekto/programa ken aktibidadesda iti Tawen 2016 ket  dagiti nagkuranganda  ket dayta ti papigsaenda iti Tawen 2017 agsipud ta kaaduan kadagitoy ti agtultuloy a programa a pagkamkammayetan nga ipatungpal ti LGU-Cabugao; Agricultural Training Institute (ATI); INREC; DA-RFO 1 ken dadduma pay nga Ahensia a makasakup iti Agrikultura tapno  maited ti kasapulan dagiti mannalon iti Munisipalidad.

Nataming ti kasasaad ti tunggal  Banner Program dagiti Technologist kadagiti destinoda a barangay ket naisingasing dagiti pangpasayaat pay iti maited a serbisio kadagiti mannalon babaen iti kolektibo a desision ti Departamento ti DA-LGU ditoy Munisipio.

Insupusop pay ni Mr. Savella   a dagitoy nga inisiatibada ket mangsuportar kadagiti report-da para iti Opisina ti Mayor, OPAG-Ilocos Sur ken iti Regional Field Office (RFO) 1, San Fernando City, La Union para iti assessment ken planning.

Nakikaysa met ni MENRO-Designate Edgar S. Balangatan, AT iti nasao a panagmiting ti DA-LGU Cabugao tapno mairagpinna  met dagiti pakaseknanna iti Seksion nga itaktakderanna. 

Dagitoy nga aksion ken inisiatiba ket paset iti panangpasayaatda iti serbisioda a mayataday iti sirmata ti LGU-Cabugao nga idauluan ni Mayor Josh Edward S. Cobangbang a mangpadur-as ti Sektor-Agrikultura ti ili. # (Web In-Action)

No comments:

Post a Comment