Thursday, January 12, 2017

UPDATE TI MUNICIPAL PLANT & NURSERY KEN GREENHOUSES ITI TAWEN 2017, NAAMMUAN

Cabugao. Ilocos  Sur – Imbatad ni Municipal Agriculturist Mr. Robert S. Savella ken  ni  MENRO Edgar  S.  Balangatan, AT,  a nadumaduma ti klasena a seedlings ti naiparuar iti Tawen 2016 iti Municipal Plant and Nursery  ken nagduduma  ti  nagmulaan  dagiti nagkalikagum a grupo wenno indibidual.

Ita a Tawen 2017,  saan laeng a pagpatan-ayan ti madadaan a seedlings  a maimula iti ar-aramidenda iti Municipal Plant and Nursery no di pay ket agpatanorda latta iti seedlings a sulnit dagiti naiparuar babaen kadagiti bukel a mapatubo tapno mapaadu ken adda latta iti maimula a kayo a para iti pannakasustener ti Regreening Program iti intero a mabalin a mapagmulaan iti Munisipalidad.

Babaen iti panangidaulo dagiti Personnel ti DA-LGU a tultulongan dagiti JOs ti DA-LGU, inaldaw a masibogan dagiti seedlings kasta metten  a maparut dagiti agtubo a ruot tapno dumakkel dagiti seedlings  ket adda a maisagsagana a maimula a para iti panagtutudo a bulbulan.

Kabayatanna, nadalusan ken naestimar metten  ti dua a Greenhouse a nakaimasetasan dagiti nagduduma a bukel ti nateng a naggapu iti HVCDP, DA- RFO 1 a manamnama a pangalaan dagiti interesado nga agmula ken mamulaan metten  iti uneg dagiti Greenhouses kalpasanna.

Dagitoy nga aktibidad  ket paset iti Direktiba ti Local Chief Executive iti LGU-Cabugao iti pannakasustener ti sapasap a programa iti panangpaberde iti aglawlaw ken panangalay-ay ti epekto ti Global Warming ken Climate Change. # (Web Situational Report)

No comments:

Post a Comment