Friday, January 20, 2017

BLESSING & INAUGURATION TI DBP EXTENSION OFFICE, NAANGAY

Cabugao, Ilocos Sur – Naaramid ti Blessing & Inauguration iti naipasdek a baro nga Extension Office  ti Development Bank of the Philippines (DBP) a naibalay iti Cabugao Mall, National Highway, Barangay Rizal, Cabugao, Ilocos Sur iti Enero 20, 2017 babaen iti panangannong  da Mayor Josh Edward S. Cobangbang ken ni Mr. Antonio Owen S. Maramag, Senior Vice President & DBP Chief Marketing Officer a binayabay dagiti kameng ti Konseho Munisipal,  Department Heads ti LGU; Bisita; DBP Officials ken Employees  iti pannakagetteng ti laso a mangipakita iti panaglukat ti nasao nga Opisina ti Bangko.


Iti umuna a parte ti programa, indauluan ni Rev. Fr. Felix A. Costales ti Opening Prayer; simmaruno ti Lighting of the Candle sa iti Ceremonial Cutting of the Ribbon. Naisaganad ti Blessing of Bank Premises; ken Unveiling of the Branch Marker.

Iti maikadua a paset ti programa, nagsarita ni Senior Manager Marjorie Anne R. Munoz, Head,  DBP Vigan Branch. Inlawlawagna ti dadduma a panggep ken pakabuklan ti serbisio ti DBP ditoy Cabugao.

Nangted ti mensahena ni Mayor Josh Edward S. Cobangbang. Kimmablaaw ken nagyaman iti sapasap a nagatendar. Dinakamatna ti pateg ti kaadda iti banko a mangipaay iti premier development babaen iti panagpartner ti private ken public nga agresulta iti agtultuloy a progreso ti ili a Cabugao manipud kadagiti narugian a sustenable a programa a para iti kaaduan.

Nagsarita met ni SVP Maramag. Kimmablaaw ken nagyaman kadagiti umili ken dagiti Opisiales a naitaripnong. Bininsana ti namunganayan ti DBP a naipasdek pay laeng idi 1947 kasta metten iti akem daytoy a makipagaramid  iti pagdur-asan ti ili a Cabugao.

Simmaruno a nagsarita ni Assistant Vice President Maria Dolores C. Guevara, Head DBP-Regional Marketing Center-Northwestern Luzon. Inlawlawagna ti dadduma nga akem ti DBP a kas maysa a kangrunaan a banko iti Gobierno Nasional a mangpadur-as iti pagilian ken iti lokalidad partikular iti impraestruktura a kangrunaan ita a programa ti Gobierno Nasional.


Dinakamat pay ni AVP Guevara iti pakasarakan kadagiti sanga ti DBP iti dadduma a lugar ken dagiti agdama a kasasaad dagitoy.

Nangipaay met ti Mensahena ni Pasado Mayor Edgardo “Ediboy” S. Cobangbang, Jr. Kimmablaaw ken nagyaman ti Pasado Mayor iti dakkel a pammati ti  DBP a mangidanon ti banking services ditoy Cabugao. Dinakamatna ti pateg ti good policy making ken atiddog a partnership dagitoy nga institusion ken ahensia tapno manayonan pay iti panagprogreso ti ili a sagrapen ti kaaduan.

Nagpaay nga Emcee ni Ms. Karmela Grace G. Luzadas.

Nakikaysa iti Blessing & Inauguration da San Juan Vice Mayor Elaine Sarmiento; Mrs. Jerlie Seguban-Cobangbang;  SBM Danny Q. Gazmen;  SBM Vicky S. Serna; SBM Dr. Jemaima S. Tan-Yee; SBM Josefina S. Vallejo; SBM Atty. Randy B. G.  Kinaud; ABC Pres. Teddy Soller; Mr. Jeremy S. Seguban; Mr. Pablo Tan;  Municipal Engineer Crescencio Marcos C. Formoso ken ni MPDC Florante S. Jara. # (Web In-Action)


No comments:

Post a Comment