Cabugao, Ilocos Sur – Agpada ti napintas a pannakarambak ti Paskua 2016 iti pannakaselebrar ti Baro a Tawen 2017 iti ili a Cabugao, Ilocos Sur.
Kamalman ti Disiembre 31, 2016 ket naobserbaran iti karuay ti naggatang iti torottot ken mapagsasanguanda iti countdown ti 2016 ken 2017 iti umay a rabii.
Maibatay iti rekord ti Municipal Police Station, imbatad dagiti naka-duty a Polis a namantener ti kinatalna dagiti nagselebrar ken kinasayud ti trapiko. Kangrunaan a nangidaulo ti LGU-Cabugao iti Midnight Mass idi Disiembre 24, 2016 ken Disiembre 31, 2016 a kaduana ti Parish Pastoral Council.
Kanaig itoy, naaramid ti Nasantuan a Misa iti agsapa ti Enero 1, 2017 (nagsaruno) iti Simbaan Romano Katolika ken kasta metten kadagiti simbaan, kapilia ken denominasion ket nagselebrar met dagiti kameng ti nagduduma a relihion/pammati a nangsarabo iti isasangbay ti Baro a Tawen 2017.
Narambak, natalna ken nasayud ti pannakaselebrar ti New Year 2017 ditoy ili ti Cabugao, Ilocos Sur maigapu iti pannakamantener ti linak ken talna iti napaut a Holiday Season kas impakaammo iti Cabugao Municipal Police Station.
Iti espiritual a benneg, narambakan ti RAMBAK BARO TAWEN ti Cabugao Catholic Church ken napintas met ti panagselebrar dagiti dadduma a Sekta ti Pammati a nagselebrar ti Paskua 2016 ken New Year 2017.
Intultuloy met latta dagiti pamilia, agkakabagian, ken aggagayyem iti nagselebrar babaen iti piknik, salu-salo ken panagpasiar kadagiti tourist destinations a masarakan iti lokalidad. Adu met ti nagselebrar iti sidong lattan dagiti patpatgenda ti biag.
Saan a mapunas ti kaugalian iti Kultura ni Ilokano nga iti panagsukat ti Tawen ket kaipapananna ti Baro a Namnama nga agballigi babaen iti Baro a Gannuat ken Sirmata iti Biag. # (Web Situational Report)
No comments:
Post a Comment