Cabugao, Ilocos Sur - Nairugi ti panagsanay ti Carpentry iti 15 a Trainees a naggapu iti nadumaduma a barangay ti ili a Cabugao, Ilocos Sur iti Cabugao Cultural and Sports Complex ken iti Motorpool ti LGU-Cabugao a nangrugi idi Disiembre 7, 2016.
Maitultuloy ti panagsanay ita nga Enero 2017 agsipud ta naputed gapu iti napaut a bakasion iti Holiday Season ti Paskua 2016 ken iti Baro a Tawen 2017 ket manamnama a mairingpasen iti nasapa a paset daytoy a bulan.
Ti panagsanay ket agpaut iti 24 nga aldaw, segun ken ni Mr. Glevin Servania ken ni Mr. Jessie Cariaga, agpada a Trainor manipud iti Igama Colleges Foundation, Inc., Badoc, Ilocos Norte.
Daytoy a rusuat ket ipatungpal ti LGU-Cabugao babaen iti BUB Program ken iti Technical Education and Skills Development Authority (TESDA)-Vigan City ditoy Cabugao kadagiti indibidual a mangpadur-as ti kabaelanda kadaytoy a maiyadal a kasapulan ti lokalidad iti agdama.
Kangrunaan nga anag ti mensahe ni Mayor Josh Edward S. Cobangbang maipapan kadagitoy a panagsanay ket iti panagyamanna iti TESDA iti agtultuloy a pannakitinnulongna a mangipatungpal iti skills training babaen iti panagkammayet ti TESDA, DILG ken ti LGU-Cabugao. Kinuna pay ni Mayor Josh Edward a kasapulan met nga ipasnek dagiti agsanay tapno naan-anay a mapadur-as ti kabaelanda. Insupusop ti Ama ti Ili a kitkitaenda iti Munisipio dagiti maitulong kadagiti agsanay tapno maikkanda iti titulo a kas iti National Certificate (NC II) a mabalinda nga usaren iti panagtrabahoda ditoy ken idiay abroad kalpasanna.
Kabayatanna, tartarabayen ni Mr. Edgar S. Balangatan, AT, BUB Coordinator dagiti agsanay ken mangsanay kadagiti agbalin a karpintero.
Daytoy a panagsanay ket maisayangkat babaen met laeng iti Bottom-up Budgeting (BUB) Program ti LGU-Cabugao iti pannakikammayetda iti TESDA. # (Web In-Action)
No comments:
Post a Comment