Tuesday, January 24, 2017

WHITE GREEN CORN, AGTULTULOY A MAIPAMULA KADAGITI MANNALON

Cabugao, Ilocos Sur – Tamtamingen ni Mr. Obas Bill Y. Baclig, Agriculture Technologist  ti LGU-Cabugao ti programa iti Corn Production kadagiti mannalon iti Barangay Bungro, Cabugao, Ilocos Sur a napauluan iti “Season-Long Farmers Field School of Local Farmer Technician   on Sustainable Corn Production”  nga inesponsoran ti DA-RFO 1, San Fernando City, La Union ken ti LGU-Cabugao nga idauluan ni Mayor Josh Edward S. Cobangbang.


Innayon ni Mr. Baclig a naimula ti bukel a masasao a White Green Corn  iti naisibar a “Learning Field” dagiti Farmer-Partners iti uppat a Treatment  idiay Barangay Bungro, Cabugao, Ilocos Sur itatta a Dry Season 2016-2017.

Innayon ni Mr. Baclig a no agtultuloy a maadaptar daytoy a wagas ti panagmula ti mais ket assideg a manayonan ti masapulan dagiti mannalon nangruna ta nalaka a malako ken mabalin a pagsaramsam daytoy a baro a takuat a produkto.

Innayon ni Mr. Baclig nga immuna a  naipadas a naimula idi Disiembre 2, 2014 iti bukel ti nasao a White Green Corn iti kalawa a 5,000 Metro-Kuadrado (Media-Ektaria)   a nagpaay a “Learning Field” dagiti 25 a Farmer-Partners idiay  Barangay Nagsantaan, Cabugao, Ilocos Sur.

Kalpasan ti pitopulo nga aldaw manipud iti pannakaimulana, nagresulta ti pannakaapitda iti 55,555 a kagumi (maysa a bunga) ti puraw a mais iti  naproduktoda. Nalako iti P3 ti tunggal bunga ket nagkair nga P166,665 ti napaglakuan ti amin.


Kalpasan a maikkat  ti gastos ket naka-netoda  iti P130,847 itoy a gudua ti ektaria a namulaan ti mais. Naapit ti naimula a mais idi Pebrero 10, 2015.

Naipadas manen ti bukel a masasao a White Green Corn iti kalawa a 3,600 Metro-Kuadrado a nagpaay a “Learning Field” dagiti Farmer-Partners idiay Barangay Bato, Cabugao, Ilocos Sur idi Dry Season 2015-2016.

Kalpasan a maikkat  iti amin a nagastos ket naka-netoda  iti P36,000.00 itoy a kalawa ti  namulaan ti mais, segun pay ken ni Mr. Baclig. 

Timmulong da Mr. Henry B. Saliganan ken ni Mr. Bert Vicente, agpada a Local Farmer Technician (LFT) kadaytoy a proyekto ti DA-LGU. # (Web In-Action) 

No comments:

Post a Comment