Cabugao, Ilocos Sur - Nairugi ti panagsanay itI Plaster Concrete/Masonry Surface (Leading to Masonry NC II) iti 15 a Trainees a naggapu iti nadumaduma a barangay ti ili a Cabugao, Ilocos Sur ket aktual nga agsansanayda idiay mabangbangon a pasdek ti Cabugao Evacuation Center ken ti Gabaldon Building (under renovation) agpada a masarakan iti Brgy. Bonifacio, Cabugao, Ilocos Sur mangrugi ita nga Enero 17, 2017.
Ti panagsanay ket agpaut iti 20 nga aldaw, segun ken ni Mr. Glevin Servania, Trainor manipud iti Igama Colleges Foundation, Inc., Badoc, Ilocos Norte.
Daytoy a rusuat ket ipatungpal ti LGU-Cabugao babaen iti BUB Program ken iti Technical Education and Skills Development Authority (TESDA)-Vigan City ditoy Cabugao kadagiti indibidual nga agduyos a mangpadur-as ti kabaelanda kadagitoy a teknikal a maiyadal a kasapulan ti lokalidad iti agdama.
Kapanunotan ni Mayor Josh Edward S. Cobangbang maipapan kadagitoy a panagsanay ket iti panagyamanna iti TESDA iti pannakaited ti skills training babaen iti panagkammayet ti TESDA ken ti LGU-Cabugao. Kuna ni Mayor Josh Edward a kasapulan met nga ipasnek dagiti agsanay tapno naan-anay a mapadur-as ti kabaelanda. Insupusop ti Ama ti Ili a kitkitaenda iti Munisipio dagiti maitulong kadagiti agsanay tapno maikkanda iti titulo a kas iti National Certificate (NC II) a mabalinda nga usaren iti panagtrabahoda ditoy ken idiay abroad kalpasanna.
Kabayatanna, tartarabayen ni Mr. Edgar S. Balangatan, AT, BUB Coordinator ken ni MPDC Florante S. Jara dagiti agsanay ken mangsanay.
Daytoy a panagsanay ket maisayangkat babaen met laeng iti Bottom-up Budgeting (BUB) Program ti LGU-Cabugao iti pannakikammayetda iti TESDA. # (Web In-Action)
No comments:
Post a Comment