Cabugao, Ilocos Sur – Iti pannaki-amad ti Web In-Action idi Enero 31, 2017, agtultuloy nga asikasuen da Mr. Obas Bill Y. Baclig, AT ken ni Mr. Nathaniel B. Galamgam, AT, Organic Production Focal Person iti pannakaipatungpal ti nasao a proyekto iti Vermicompost/Vermiculture Bin a masarakan iti compound ti Municipal Plant and Nursery, Brgy. Baclig, Cabugao, Ilocos Sur.
Innayon ni Mr. Baclig a ti Vermiculture/Vermicomposting Project ti DA-LGU ket panggepna a patuladan/tignayen ken ipakita iti epekto ti organiko a ganagan iti mula a pagay ken nateng maibatay iti sinaguday ti Akta Republika a linteg a mangipatungpal iti Organic Agriculture ket agbalin a kapartner ti DA iti LGU-Cabugao iti implementasion ti nadakamat a linteg.
Iti agdama, ti nadakamat a Vermicompost Production ti DA-LGU Cabugao ket agpaay a proyekto a mangkomplementar iti programa ti Gobierno Munisipal nga idauluan ni Mayor Josh Edward S. Cobangbang iti pannakaipatungpal/pannakaidur-as ti Organic Agriculture iti Sektor dagiti mannalon ditoy a deppaar.
Kabayatanna, pursigido ti Gobierno Lokal ti ili a Cabugao, Ilocos Sur a mangipatungpal iti pannakausar ti Organiko nga abuno iti pannakaidur-as ti agrikultura ditoy nga ili babaen iti pannakairubuat ti programa manipud idi Tawen 2014 babaen iti pannakaited dagiti kasapulan dagiti Recipient-Farmers.
Inulit nga imbaga ni Mr. Nathaniel B. Galamgam, Municipal Focal Person iti Organic Agriculture Program a naiteden dagiti pangrugian a kasapulan dagiti benepisiario a Farmer-Cooperators iti kallabes a nakabuklan ti 3 a Knapsack Sprayer, 40 Bags Organic Fertilizer ken 30 Bags a Mungbean a kas maibatay iti kasapulan ken area a nasakupan ti tunggal Cooperator ti programa. Kanaig daytoy, kuna ti Teknisian a makaammoda metten nga agdiskarte iti pagsustenerda ti proyektoda tapno maipamaysa met ti DA-LGU kadagiti dadduma nga interesado nga ag-organic production.
Innayon pay ni Mr. Galamgam a babaen iti pannakikammayet ti Municipal Agriculture Office kadagiti pribado a kompania nga agparpartuat iti organiko a ganagan ket maiwanwan dagiti mannalon a mangitultuloy iti panagusarda iti natural a pataba tapno agbalin a sustenable ti programa ti Gobierno Lokal a pakaisagutan dagiti mannalon.
Kinuna pay ni Mr. Galamgam nga iti pannakaipakita ti umisu a wagas ken addang kadagiti Techno-Demo ti Munisipio kadagiti Beneficiaries ket in-inut a maadaptar dagiti dadduma a mannalon babaen iti panangtuladda ket agresulta iti panagsaknap ti pannakaipakat daytoy a teknolohia iti Tawen 2017 a mangikabassit ti gastosen ni mannalon ken mangnayon iti masapulanda iti panagmulaan. Iti kasta, mangited latta iti pagimbagan ti sapasap agsipud ta makapagtaraonda iti produksion a nagtaud iti naorganikoan a produkto. # (Web In-Action)
No comments:
Post a Comment