Cabugao, Ilocos Sur – Agtultuloy ti pannakaited ti serbisio nga ipatungpal ti Cabugao Waterworks System nga idauluan ni Engr. Nestor Somera, Waterworks Superintendent iti Tawen 2017.
Iti pannaki-amad ti Web In-Action iti Pebrero 6, 2017, imbatad dagiti Waterworks Personnel iti regular a pannakamantener dagiti distribution ken main line tapno naannayas ti panagusar dagiti consumers iti danum. No adda problema a tumaud iti linia ti danum, dagus a maaksionan babaen ti panangipakaammoda iti Hotline Number ket agaktuar a dagus ti puersa ti Waterworks Section ti LGU.
Kanaig daytoy, imbatad ni Engr. Nestor B. Somera a mantenerenda ti napintas a koordinasion kadagiti maseknan nga Ahensia wenno indibidual a makadalapus kadagiti linia ti danum tapno maliklikan ti pannakaperdi dagiti tubo tapno nasayud latta ti taray ti danum.
Kabayatanna, maisamira met a naaramid ti Cleaning ti Water Reservoir iti Barangay Lipit ken maaramid ti Clearing Operation iti main line iti Magarang Spring Source kasta metten iti linia ti Roma-Kinalian Sources iti daya.
Ti pannakaited ti agtultuloy a serbisio kadagiti umili iti maipaay a nalinis a mainum ken mausar a danum kasta metten iti regular a mentenansia ti pasilidad ti water system ket prayoridad a programa ti Gobierno Munisipal nga idauluan ni Mayor Josh Edward S. Cobangbang para iti pagimbagan ti sapasap. # (Web In-Action)
No comments:
Post a Comment