DISTRICT ENGLISH OLYMPICS 2012, NAANGAY ITI CABUGAO SCS

Cabugao, Ilocos Sur – Naangay ti District English Olympics 2012 iti Cabugao South Central School babaen ti tema: “Strengthening Basic Education Through English Literacy” iti Nobiembre 13, 2012 iti CSCS Conference Hall, Brgy. Bonifacio, Cabugao, Ilocos Sur.

Indauluan ni Mrs. May Joy S. Ranchez, Teacher 2, CNCS ken National Anthem ni Mrs. Imelda Esteban, T3, Pug-os Elementary School.

Welcome Talk ni Mrs. Melvi S. Sajonia, Principal II ti CSCS ket kalpasan ti intermission number,  impaay ni Public Schools District Supervisor Helen V. Siruno ti mensahena. Dinakamatna ti pateg ti English Subject a mangingato ti kalidad ti edukasion iti elementaria. Inramanna pay ti Mathematics subject a maysa koma  a napateg a kabaelan a patan-ayen kadagiti ubbing.

Binagi ni Mrs. Madelene S. Sonido, MT1, ti Nagsincaoan ES ti pannakaipresentar dagiti agpartisipar iti contested activities  idinto ta inakem met ni Mrs. Nora Quibilan, MT1, Sabang ES ti nangiyam-ammo kadagiti mangbukel a Hurado.

Nangipaay met ti mensahe ni Mayor Edgardo “Ediboy” S. Cobangbang, Jr. ket kimmablaaw iti amin a naitabuno. Binigbig ti Alkalde ti saet dagiti mangisursuro ken nagannak  a mangmuli kadagiti ubbing nga agballigi iti panagadalda. Kayatna a maitultuloy dagitoy a napateg a gapuanan saan laeng koma iti sports a nag-kampeonan ti Cabugao Delegation iti napalabas a Unit 1  Athletic Meet no di pay koma kadagiti dadduma a benneg ti paglaingan a pakaidayawan ti sapasap.

Impaay met ni SB Member Vicky S. Serna, Committee Chair in Education ti mensahena para iti pannakaidur-as ti lengguahe nga English kas maysa a ramit ti panagdur-as iti benneg ti edukasion.
Imbinsa met ni Ms. Jennifer D. Savellano, Cabugao District English Coordinator iti Orientation/Guidelines/Criteria ti pakontes iti Poem Recitation, Spelling, Read-A-Thon, Declamation ken Essay. Agmalmalem daytoy nga aktibidad agingga iti madanonan ti pannakaiwaragawag dagiti nangabak nga ubbing ken pannakaiwaras ti Awards ken Certificate-da.

Nagpaay nga Emcee ni Mrs. Evangeline Garcia, T3, Bungro ES. # (Web In-Action)