RUN FOR LOVE, CARE FOR KABSAT DV

Cabugao, Ilocos Sur – Naangay ti Fun Run (5,8,10-K) a nagpartisiparan ti nadumaduma a tumataray a naggapu iti nadumaduma nga ili  ti Probinsia ti Ilocos Sur idi bigat ti  Nobiembre 24, 2012 a pangselebrar ti  panagkasangay ni Vice Governor Deogracias Victor “DV” Barbers Savellano a taga-Cabugao, Ilocos Sur.

Nangrugi ti taray manipud  iti batog ti Balay-Taripato Building, Barangay Bonifacio, Cabugao, Ilocos Sur ket binayabay dagiti Medics a naglugan iti  2 nga  ambulansia  ken dagiti    pannakabagi ti linteg (MPS Cabugao) nga indauluan ni COP William N. Nerona dagiti nagsasalip.

Kalpasan ti Fun Run, natipon dagiti tumataray ken nagbuya iti uneg ti Balay-Taripato Compound ket naangay ti pannakaited ti premio dagiti nangabak. Inimatangan da Provincial Social Welfare and Development  Officer Ferdinand “Joy” R. Concepcion, Dr. Cesar Soller, DVD, Dean ken Manager ti BARANG-AY Farm ken ISCC  Agriculture  Campus kasta met ni SB Member Carlos V. Sison ti Cabugao  ken dagiti  pannakabagi ti Opisina ni Vice Gov. DV iti awarding ceremony.

Iti nasao a taripnong, impakaammo pay  ni PSWD Officer  Ferdinand R. Concepcion a maangay ti “Blood letting donation” nga imatonan ti DVBS idiay RHU-Cabugao iti Nobiembre 25, 2012. # (Web Situational Report)