ORGANIC MATERIALS PARA ITI PILOT DEMO, NAITED

Cabugao, Ilocos Sur – Naited ti  organic fertilizer/materials  kadagiti pannakabagi ti lima  a barangay (Dardarat, Salapasap, Cuancabal, Nagsincaoan ken Margaay)  a pakaaramidan ti Organic Agriculture Pilot Demo idi Nobiembre 20, 2012 ditoy mismo a Munisipio babaen ti panangited  dagiti pannakabagi ti DA-LGU nga imatonan ni Mr. Nathaniel Galamgam, Municipal  Organic Agriculture Focal Person kadagiti maseknan a mannalon.

Tunggal Farmer-recipient ket mangilasin  ti 200 metro-kuadrado iti talonda a pakaipakatan ti abuno/materiales. Matudinganda a mangaramid ti Quarterly Report a pakaipanan  ti petsa ti panagmula, panagaplikar ti abuno ken petsa ti panagapit.

Daytoy nga addang ti LGU  ket masasao pay nga “Adopt the Organic Agriculture” tapno maitandudo ti panangusar dagiti “farm residues” a mangin-inut a  mangisubli ti napukaw nga anag ti daga, mangipaay ti natalged a taraon  nga awan ti nakaro a kaadu ti elementona ken environment-friendly a wagas ti panagmula.

Ti  proyekto  ket maidemonstrar iti kada barangay agingga nga agsaknap iti Munisipalidad. Ipaay ti DA-RFU 1 dagiti  mausar ken iwardas ti DA-LGU ti pannakaipatungpalna.

Daytoy pay a gay-at  ket paset ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a makikammayet iti Departamento ti Agrikultura (DA) kadagiti  mangpasayaat ti panagmula babaen ti pannakaipakat dagiti kabaruanan  a wagas  tapno maingato ti kalidad ti panagbiag dagiti mannalon a kaaduan nga umili a pakairamanan nga agimbag ti sapasap.

Nakikaysa met a nangimatang da Vice Mayor Danny Q. Gazmen,  SB Member Dr. Carlito S. Pano, ken Mrs. Joenah G. Sevilleja, AT/DA-LGU iti pannakaited dagiti mausar iti proyekto.   # (Web Situational Report)