Cabugao, Ilocos Sur – Kalpasan ti Flag Raising
Ceremony ti Pamilia-LGU ita a Nobiembre
19, 2012 (Lunes), naited dagiti pammadayaw iti napintas a nagapuananda iti
opisina a nakaikamenganda ken kadagiti umili
a nagserbianda. Napadayawan dagiti empleado nga adda iti RHU (Medical ken
Dental); MSWDO, BFP, DA ket naipangruna ti pammadayaw a naited iti LGU Cabugao nga idauluan ni Mayor Edgardo
S. Cobangbang, Jr. gapu iti naiwayat a Dental Health Services babaen iti grupo ni Dr. Magno Sol kadagiti Day Care Children iti
barangay ti ili a Cabugao iti kallabes a bulan.
Nagtinnulong da Mr. Dario Roy Siruno, Information
Officer ken Miss Mimi Sison, HRM Officer a nangiwaragawag kadagiti napadayawan.
Inyawat ni Mayor Ediboy dagiti sertipikoda iti imatang ti Pamilia-LGU.
Iti sabali a bangir, naikkan met ti gundaway a
nagsarita ni SB Member Carlos Vallejo
Sison kas kabarbaro a naapointaran a kameng ti Sangguniang Bayan ti ili a
Cabugao, Ilocos Sur.
Pinagyamanan ni Konsehal Sison ti naipaay kenkuana
a talek nga agserbi kadagiti kailianna idiay laem ti Konseho Munisipal.
Naapointaran idi Nobiembre 5, 2012 a kas Sangguniang Bayan Member babaen ken ni Mayor Ediboy ken iti
panangilungalong ni Vice Mayor Danny Q. Gazmen.
Iti mensahe ni Mayor Ediboy, nakikaysa kadagiti
napadayawan iti pannakabigbig dagiti nagapuananda. Innayonna nga agtultuloy
koma latta ti panangipaay ti amin nga adda iti Pamilia-LGU iti serbisioda
kadagiti umili tapno mataginayon latta
ti napintas ken natalinaay a kasasaad
a panagbiag ti sapasap.
Impaay met ti Alkalde Munisipal iti nabara a
panangpasangbay ti LGU ken ni SB Member Carlos V. Sison ket naragsakan ti Ama ti Ili iti mainayon a serbisio a
mangpasayaat pay ti kasasaad dagiti umili ti Cabugao. # (Web In-Action)
No comments:
Post a Comment