Cabugao, Ilocos Sur – Agtultuloy a maisayangkat ti panagsanay ti 20 a babbai iti Cosmetology and Hair Dressing ket addada itan iti Hairdo ken panag-make up babaen iti panangisuro kadakuada ni Ms. Clara Sinampaga, Beautician/Trainor. Manamnama a maileppas daytoy a panagsanay kalpasan ti 150 oras wenno kaibatogan ti 10 nga aldaw.
Immuna ti Manicure and Pedicure sa panagpukis ket naregget dagiti trainees gapu ta nalalaingda ken simmangkalaing ti agisuro kadakuada.
Imbatad ni Mr. Nestor de los Santos, ALS-Literacy Services Contracting System (LSCS) a nagasat daytoy a batch ta isuda ti nakauna a naikkan ti kastoy a panagadal. Dagiti sumarsaruno nga agregget ket agdepende iti kaadda ti mausar tapno maisayangkat manen ti sabali a batch ti training.
Daytoy a proyekto ket nagbuligan a pinataud ken ipatungpal ti Cabugao DepEd District-Alternative Learning System (ALS) ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno maikkan ti nayon a livelihood program ti sektor-babbai nangruna dagiti inna babaen daytoy a maibagay kadakuada a pagsapulan/pagkakitaan. # (Web In-Action)
No comments:
Post a Comment