NAIPANAWEN NGA USAR DAGITI MAKINARIA

Cabugao, Ilocos Sur – Iti pannaki-amad ti Web In-Action idi Hulio 29, 2013, imbatad dagiti kaaduan a mannalon a di pay nakatalon nga iti pannakaparuar ti ubbog laeng ti pagpannurayanda tapno maiserran ti panagtalon iti matapogan ti bulan ti Agosto 2013.

Adda man irigasionna ken adda bubon wenno small farm reservoirda, saanda a madanagan iti pannakaiturong ti pagpadanumanda ta madadaan dagiti makinaria nga inted ti LGU-Cabugao kasta met dagiti hose a pagsisinnublatanda nga usaren tapno mapadanumanda ti raepda wenno isagsaganada a maraepan a talonda.

Innayonda a daytoy ti napintas nga impact ti kaadda ti makinaria, tractor, hose a kangrunaan a kasapulan iti land preparations ta manam-ayan ken maipadaras ti panagtalonda nangruna no sambotenda ti adda a danum a kasapulanda.

Kabayatanna, impakaammo ni Municipal Rice Program Coordinator Nereo S. Daproza, AT/DA-LGU nga iti panagbisitana iti intero a Munisipalidad idi Hulio 26, 203, mapatta-patta iti 45 % ti dagup ti  nakatalonen a pumatpatak ti kaibatogan a 1,013 ektarias a kataltalonan.

Nupay kasta, innayon ni Daproza nga iti kaadda ti makinaria a mausar ken iti masansan a panagtudona ket manamnama a mabassitanen dagiti saan pay a naraepan a pagtatalonan nangruna kadagiti rainfed area.

Dakkel ti pammati ni Daproza a babaen iti kinaalibtak dagiti mannalon ket matun-oyan ti bilang wenno nangatngato pay ngem iti napalabas a panagtalon ti Wet Season 2012.

Insupusop ni Daproza a kankanayon a bisitaenna dagiti barangay ken dagiti disso dagiti Techno-Demo ti Hybrid ken Certified Seeds agraman iti Seed Production Area tapno maiwanwanna dagiti mannalon ken maalana ti eksakto a bilang dagiti makatalon.

Dagitoy nga aksion ken inisiatiba ket gubuay ti napintek a programa ti LGU-Cabugao iti Agrikultura babaen iti panangidaulo ni Mayor Edgardo “Ediboy” S. Cobangbang, Jr. tapno maragpat a kanayon ti “Food” Sufficiency” para kadagiti umili ti Cabugao, Ilocos Sur. # (Web In-Action)

LIVELIHOOD PROJECT, NAITED ITI PWD-CABUGAO

Cabugao, Ilocos Sur – Naited ti Tseke nga agbalor iti P143,500 para iti Goat Production and Management kadagiti Person With Disability (PWD)  ti ili a Cabugao nga idauluan ni Mr. Dante Ullero, Presidente,  idi Hulio 29, 2013 iti mismo nga Opisina ti Mayor ti ili.

Inyawat ni Mayor Edgardo “Ediboy” S. Cobangbang, Jr. daytoy a bagi ti tulong-pinansial  kadagiti adda an-annayenna a sektor iti imatang da Ms. Fresnaida A. Gundran, DOLE Head, Ilocos Sur Field Office a kaduana ni Ms. Charity Ubilas ken kasta  met dagiti pannakabagi ti Human  Resources Management Office (HRMO)-Cabugao nga idauluan ni Miss Mimi Sison.

Pinagyamanan ni Mr. Ullero daytoy a naipaay a tulong kadakuada ti Gobierno Munisipal nga idauluan ni Mayor Ediboy kasta met dagiti Opisiales ti DOLE-Ilocos Sur  ta maikkanda iti importansia nga umagawa iti pagsayaatan ti asosasion-da ken dagiti kamkamengda. # (Web In-Action)

INTER-AGENCY TREE PLANTING, NAKIKAMMAYET TI MUNISIPIO

Cabugao, Ilocos Sur – Naaramid ti Tree Planting Activity dagiti pannakabagi dagiti  nagkakammayet nga Ahensia/Opisina  nga idauluan ti LGU-Cabugao iti panangidaulo  ni Mayor Edgardo “Ediboy” S. Cobangbang, Jr.  kasta met dagiti Opisina a nakasalinong iti Gobierno Lokal a kas iti MSWDOO, DILG-MLGOO, PNP-Municipal Police Station, Bureau of Fire Safety-BFP Cabugao, Opisiales ti Barangay ken asosasion iti Barangay Sabang, 4 P’s Beneficiaries ken dagiti pannakabagi ti National Tobacco Administration (NTA) a nagpaay a Lead Agency kadaytoy a Synchronized Tree Planting iti Probinsia ti Ilocos Sur para iti National Re-greening Program.
 

CLICK HERE TO VIEW MORE PHOTOS

Ditoy Cabugao, naangay  ti Ceremonial Planting iti EC Farm, Barangay Sabang, Cabugao, Ilocos Sur ket naimula ti 1,600 a Giant Ipil-ipil Seedlings.

Kabayatanna, nakikaysa met dagiti Opisiales ti NTA-Vigan City nga indauluan ni Atty. Everin Molina, NTA Deputy Administrator for 

Support Services/Manager, NTA-Vigan City a nagbisita iti Planted  Site.

Imbatad ni MENRO Edgar S. Balangatan nga uppat a tawen a mapatan-ay dagitoy a naimula a  seedlings sa mabalinen  a maapit. Panggep ti NTA ken ti DENR a maimula babaen kadaytoy a programa ti 1 Million a Seedlings iti Ilocos Sur para iti Tawen 2013. # (Web In-Action)

CLICK HERE TO VIEW MORE PHOTOS

NAGSARUNO NGA AKTIBIDAD TI CABUGAO SCS, NAANGAY

Cabugao, Ilocos Sur – Naangay ti Math Classes  dagiti napili nga agad-adal iti intero a pageskuelaan  (26 ti bilangna) iti Cabugao DepED District idi Hulio 27, 2013 iti mismo a pagadalan ti Cabugao South Central School, Brgy. Bonifacio, Cabugao, Ilocos Sur.

Kangrunaan a panggep daytoy nga aktibidad ti panangisagana kadagiti ubbing a naganus ti panunotna a mamuli iti sirib ti Matematika a nausar nga asignatura iti benneg ti Edukasion para iti masanguanan a salip ken dagiti maituyang nga eksaminasion iti amin a kategoria iti masanguanan nga aldaw.

Iti sabali a bangir, rinambakan pay  ti nasao a pagadalan ti pannakaselebrar ti Nutrition Month ita a bulan ti Hulio idi Hulio 29, 2013 iti CSCS Social  Hall a nagatendaran dagiti amin nga agad-adal ti Cabugao South CS nga idauluan ni Mrs. Melvi S. Sajonia, Principal II ken dadduma a nagannak/Guardians.

Kangrunaan a sangaili ken nagsarita ni Public Schools District Supervisor Helen V. Siruno a nangibinsa ti pateg ti panangtaginayon ti nasustansia a pagtaraon dagiti ubbing tapno sumayaat ti panagadalda. Kinarit ti Superbisora dagiti amin a nagannak ken Guardians  a makipasetda iti naregget a programa ti LGU-Cabugao iti pannakaipakat iti sumra  ti Malnutrision kadagiti ubbing nangruna kadagiti barbarangay tapno makapataud latta met dagiti pageskuelaan iti nasaririt nga agad-adal.

Malaksid ti panagsarita dagiti dadduma nga Speakers, naaramid ti salip dagiti ubbing iti nagduduma a kategoria a nakaitedan met dagiti  Cash a gunggona. #  

SOFT LOAN, NAIPANAWEN PARA ITI ALINAAY FA

Cabugao, Ilocos Sur – Inawat dagiti Opisiales ti Alina-ay Farmers Association nga idauluan ni Mr. Jovencio Selma ti soft loan (Plant Now Pay Later Program) ti LGU-Cabugao nga aggatad ti P20,000 ita a Wet Season Crop 2013 (Hunio-Nobiembre).

Inawat ni President Selma ti Tseke ken ni Mayor Edgardo “Ediboy” S. Cobangbang, Jr.  iti mismo nga Opisina ti Alkalde Munisipal iti Hunio 29, 2013 iti imatang  ni Mayor Ediboy, pannakabagi ti Alina-ay FA  ken dagiti kameng ti Sangguniang Bayan nga inyuna ni Vice Mayor Deogracias Jose Victorino H. Savellano.

Iti pannaki-amad ti Web In-Action ken ni President Selma, impeksana ti nalaus a panagyamanna kadagiti Opisiales ti LGU-Cabugao nga idauluan ni Mayor Ediboy  iti pannakaruk-at daytoy a pundoda gapu  ta naipanawen a kasapulanda ti nayon iti usarenda iti panagtalonda.

Kabayatanna, adda metten sumagmamano nga asosasion a nakaawaten ti soft-loanda manipud  iti Munisipio babaen iti pannakaannurotda kadagiti pagalagadan nga intuyang dagiti mangimatmaton kadaytoy a programa ti Munisipio itoy a Tawen 2013. # (Web In-Action)

TECHNO-DEMO TI BRGY. SAGAYADEN, NAMULAANEN

Cabugao, Ilocos Sur – Naraepanen ti Municipal Techno-Demo ti Brgy. Sagayaden Norte, Cabugao, Ilocos Sur babaen iti naregta a panangigannuat dagiti pannakabagi ti Munisipio nga idauluan ni Mr. Edgar S. Balangatan, AT/Techno-Demo Coordinator.

Namulaan ti SL 8H Hybrid Rice ken  PSBRc  82-Farmers Variety babaen ti pannakitimpuyog da Mr. Humprey S. Catriz ken ni Mr. Noel Rania a kakadua ni Mr. Balangatan.

Daytoy a Techno-Demo ti kapatakan ti disso a pakakitaan dagiti mannalon iti wagas ti panagpatanor ti Hybrid rice babaen iti nagtitipon a pamuspusan ti panangpataud ti pananuman kas iti tudo, mapakunotan ti water pump ngem agballigi latta ti proyekto agsipud ta ditoy a masagat ti inalat dagiti mangimaton no kasano a mapatan-ayda ti kabaruanan a klase ti pagay a maiparbeng koma a maimula iti na-irigasionan a disso.

Innayon ni Mr. Balangatan  a kaaduanen ti nagbalin a  hybrid producers kadagiti mannalon iti irrigated areas  ti ili ket daytoy ti gapuna nga adaptarenda met ti pannakaipromot daytoy a teknolohia ti panagmula ti pagay  iti kaaduan a pagtatalonan  nga awan ti irigasionna a  mawidawidan daytoy a proyekto.

Dagitoy nga aksion ken inisiatiba ket gubuay ti napintek a programa ti LGU-Cabugao iti Rice Farming  nga idauluan ni Mayor Edgardo “Ediboy” S. Cobangbang, Jr. tapno saan a maarus dagiti mannalon iti pannakain gato ti maapit babaen iti panangipakatda iti dumurdur-as a teknolohia ti panagtalon. # (Web In-Action)

DIALOG TI CISTODAI, NAARAMID

Cabugao, Ilocos Sur – Naaramid ti panagsasarita dagiti Opisiales ken Miembros ti Cabugao Ilocos Sur Tricycle Operators Drivers Association, Incorporated ken dagiti pannakabagi ti LGU-Cabugao a da Mayor Edgardo “Ediboy”  S. Cobangbang, Jr. ken ni ABC President Teddy U. Soller iti mismo nga Opisina ti CISTODAI idi Hulio 28, 2013.

Natratar dagiti pakaseknan ti plete, rota ti panagpasada ken parkingan ken kanaigna a pagsayaatan daytoy a sector.

Pinagyamanan ni Mayor Ediboy ti panagaktibo daytoy a sector ket no la ket ta maipakitada a mapasayaatda ti rekordda kasta met iti panangannurotda kadagiti pagannurotan a naituyang para kaduada ti LGU ket maited dagiti kalikagumda.

Maysa daytoy ti pannakaruk-at ti soft loan-da a P150,000 ken pakaaramidan ti masnop a pagparkinganda.

Innayon ni Mayor Ediboy a madamada nga ad-adalen ti pagplastraan dagiti pasilidad a mainayon iti NISTC-Public Market ket saaan pay a maituding ti pagyanan dagiti traysikelan.

Insupusop met ni ABC President Teddy U. Soller nga iti pagsayaatan ti masakbayan ti asosasionda ti ipamaysada ta kitkitaen ti LGU dagiti mainayon pay a pagimbagan a maisangrat para kadagitoy.

Ti CISTODAI ket buklen ti ag-900 a kameng iti 33 a barangay ti ili. Maibasar iti rekordda, adda 583 nga aktibo a kameng ti Saranay-da a mangipaay ti kasapulanda iti panawen ti emerhensia.

Impasingked pay ti Alkalde Munisipal a komplementaran ti Munisipio dagiti kalikagumda ngem kasapulan nga ipaneknekda a maidumada ti magapuanan kadagiti traysikelan iti kabangibang nga ili. # (Web In-Action)

CABUGAO DAYO, SAANEN A PAATIW ITI KINATIMPUYOGDA

Cabugao, Ilocos Sur – Iti pannaki-amad ti Web In-Action idi Hulio 27, 2013, imbatad ni Mr. Dante Naval, Municipal Meat Inspector a saanen a paatiw ti Cabugao Livestock Traders Association no maipapan iti pannakasustener ti dayo iti tunggal aldaw ti Sabado kada lawas.

Innayon ni Mr. Naval a dandanin maisubli ti naan-anay a panagtulid ti puonan ti Dayo ta masirmata dagiti kameng nga awan sabali a makatulong iti asosasionda no di isuda met laeng babaen ti panagagawada.

Pinagyamanan met ti asosasion iti panangidaulo ni Mr. Marciano Raciles, Presidente iti patinayon a panangtarabay kadakuada dagiti pannakabagi ti LGU-Cabugao nga idauluan ni Mayor Edgardo “Ediboy” S. Cobangbang, Jr. iti kaaldawan ti Dayo ket agpaay daytoy nga inspirasionda a mangpapintas pay ti transaksiones a daytoy ti kangrunaan a mangiragpat ti panagballigi ti Dayo.

Manamnama nga umad-adu latta ti maki-dayo, nabun-as dagiti ayup a mai-dayo ken natunosda nga agkakadua a mangpaprogreso ti hanayda. # (Web In-Action)

SISIM NHS, NUTRITION MONTH CULMINATING ACTIVITY

Nagselebrar ti Sisim National High School ti Nutrition Month  addaan ti Tema “Gutom at Malnutrisyon  Sama Sama Nating Wakasan”, idi July 26, 2013.

Kas panangselebrar naangay ti naduma duma nga pasalip kas iti Food Fair, Table Setting, Flower Arrangement, Fruit Carving, Cookfest, Nutri Moves, Nutri jingle,Vegetable Mascot,ken Poster Slogan Making Contest.

Nagserbi nga judge da Roy Siruno, Municipal PIO, Mrs. Dina Siena, BHW Sisim ken Mrs. Daisy Serdenia DCW Sisim.

Napnuan ragsak dagiti agad adal ti babaen iti kastoy nga aktibidades maipakitada dagiti talent da ken dagiti adal ti kinapateg ti usto nga nutrisyon.

VERMICOMPOSTING/CULTURE, AGTULTULOY A MAPADUR-AS

Cabugao, Ilocos Sur – Iti pannaki-amad ti Web In-Action idi Hulio 25, 2013, imbatad ni Municipal Organic Focal Person Nathaniel Galamgam, AT, DA-LGU nga agtultuloy a pakanenda dagiti Night Crawler nga alinta iti nagduduma a crop wastes ken rugit ti animal tapno gumagetda nga agrugit a daytoy ti pakapataudan ti natural a pataba a pabor iti mulmula a saan ketdi a patinayon nga agpannuray dagiti mannalon iti komersial a ganagan.

Manamnama nga iti masanguanan nga aldaw ket ag-harvestda iti  maibinglay manen kadagiti agar-aramid iti organic fertilizer kas idiay Brgy. Marga-ay, Cabugao, Ilocos Sur tapno maipakat ti sinaguday ti Organict Act a paglintegan ti Gobierno Nasional para  iti Agrikultura.

Kasta metten a maited kadagiti interesado a mannalon nga agpatanor iti vermicomposting a masasao a “gaya-gaya system”, segun pay ken ni Mr. Galamgam.

Dagitoy nga aksion ken  inisiatiba ket gubuay ti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr.  iti panangannurot iti Organic Act a mangpasayaat ti kasasaad dagiti mannalon iti Munisipalidad. # (Web In-Action)

PROYEKTO TI DA TI SALOMAGUE ROAD, NALPAS

Cabugao, Ilocos Sur – Naaramid ti side railings ken Sectional Slope Protection ti nagkawatiwatan a paset ti National Road  (iti Batog ti Brgy. Baclig) nga agpa-Salomague Port, Brgy. Salomague, Cabugao, Ilocos Sur.

Daytoy a proyekto ket napunduan babaen iti Departamento ti Agrikultura (DA)  ken nailungalong babaen iti Gobierno Munisipal nga idauluan ni Mayor Edgardo “Ediboy” S. Cobangbang, Jr.

Iti pannaki-amad ti Web In-Action iti Hulio 26, 2013, impeksa  dagiti Commuters ken  Drivers ti amin a behikulo a lumablabas  kadaytoy a kalsada iti nalaus a panagyamanda iti nagkadua nga ahensia ti Gobierno iti pannakapaadda dagitoy a proteksion ti kalsada a pabor para kadagiti agdaldaliasat. # (Web In-Action)

VEGETABLE GROWERS MEETING, NAANGAY

Cabugao, Ilocos Sur – Naangay ti Special Meeting ti Cabugao Vegetable Growers/Producers Association nga idauluan ni Kagawad Armando Azcueta iti Hulio 22, 2013 iti Municipal Building, Cabugao, Ilocos Sur.

Kangrunaan nga agendum a natratar ket ti pannaka-organisar ti Brgy-based associations ti vegetable growers a maisalinong iti Ilocos Sur Vegetable Growers Association a kalikaguman ni Gobernador Ryan Luis V. Singson a mapagtitimpuyog para iti pagimbagan iti agmulmula ti nateng.

Impeksa met ni Mayor Edgardo “Ediboy” S. Cobangbang, Jr. a naawis a nagatendar iti nadakamat a miting ti panagyamanna iti Gobierno Probinsial ta nabigbigda ti inisiatiba dagiti asosasion ti ili a Cabugao a mangprobitsar iti serbisio nga itden dagiti mayataday nga Ahensia para iti pagsayaatan ti kamiembruanda.

Innayon ni Mayor Ediboy a mainayon manen a pigsa ti barangay iti kaadda ti asosasion a nakasalinong iti Pederasion ti Ilocos Sur Vegetable Growers ket dinakamatna a mairaman met a mapagmiembro koma  dagiti agmulmula ti sabali a cash crops tapno sapasap a maisagut dagiti bumarangay.

Imbatad ni Kagawad Azcueta a babaen ti panangirepresentarna kadagiti vegetable growers ti ili iti naaramid a mitingda idiay Probinsial  ket  maitulad met a maaramid ti ID System ti kamkameng  daytoy nga ipatakderda a Pederasion ti Vegetable Growers.

Innayon ni Kagawad Azcueta a kasapulan a maorganisar dagiti agnatnateng iti barangay iti kabiitan a panawen  agsipud ta kalikagumanda iti naan-anay a panagkaykaysa dagiti agpatpatanor ti nateng iti Ilocos Sur tapno maipatungpalda ti programa ken proyekto para iti daytoy a sektor ti kagimongan.

Dadduma pay a napagsasaritaan ket iti reorganisasion dagiti asosasion iti salinong ti Cabugao Vegetable Growers Associations, update ti Constitution and By-Laws ken Financial Records-da tapno masagsagana latta iti aniaman a transaksion a pakasapulanda.

Nagatendar met dagiti pannakabagi ti DA-LGU nga idauluan ni Municipal Agriculturist Zenaida S. Andrada iti nadakamat a miting. # (Web In-Action)

UMAD-ADU TI MAI-DAYO, MAINAYNAYON A GAPUANAN

Cabugao, Ilocos Sur – Iti pannaki-amad ti Web In-Action idi Hulio 20, 2013, imbatad ni Mr. Marciano Raciles, Jr.,  Presidente ti Cabugao Livestock Traders Associations nga umad-adu ti transaksion gapu iti panagawisda ti taga-sabali nga ili  a trakan ken Koridor a mangkita iti pagdurdur-asanen ti Cabugao Dayo.

Innayon  ni Mr. Raciles a kanayon nga  igunamgunamna kadagiti kakaduana a Koridor a reggetanda ti mangpadur-as ti dayo tapno makomplementaran ti panangilungalong ti Gobierno Probinsial ken Lokal a mangnayon ti kasapulan ti Livestock Sector tapno masustener ti programa a mangpasayaat pay  iti bennegda.

Insupusop met ni Dr. Melvin Castro, DVM, Municipal Livestock Coordinator a nakammayetda met a pannakabagi ti Munisipio a mangtartarabay kadagiti ag-dadayo iti tunggal aldaw ti Sabado ken Domingo. Kanaigna iti napintas a serbisio ti Slaughterhouse nga imatonan ni Municipal Meat Inspector Dante Naval  iti serbisio nga itden ti Dayo gapu ta kaaduan a nuang ken baka ti magatang a maparti manipud iti Dayo.

Dagitoy nga aksion ken inisiatiba ket gubuay iti napintek a programa iti livestock ti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno agtultuloy nga agprogreso ti industria ti ayup ken dinguen iti Munisipalidad ti Cabugao. # (Web In-Action)

GENERAL ASSEMBLY TI CABUGAO NORTH CENTRAL E/S, NAANGAY

Cabugao, Ilocos Sur – Naangay ti General Assembly Meeting dagiti mangisursuro nga idauluan ni Mrs. Estrellita M. Siruno, Principal II ti Cabugao North Central School ken ti Parent Teachers Association nga idauluan ni Mr. Maxfel S. Suboc, Presidente idi Hulio 19, 2013 iti Cabugao Cultural and Sports Complex, Brgy. Rizal, Cabugao, Ilocos Sur.

Natratar dagiti nagapuanan ken plano para iti sumaruno a tawen ti panagklase dagiti ubbing iti Tawen 2013-2014 iti benneg ti pagadalan ken dagiti naggannak  ti ubbing.

Kangrunaan a sangaili ditoy a meeting ni Mayor Edgardo “Ediboy” S. Cobangbang, Jr. a nangipaay ti Mensahena para  iti amin a naitallaong kadayta a gundaway. Kimmablaaw ken binigbig ti Alkalde Munisipal ti nagapuananda  ken  ti agtultuloy a panagdur-as ti eskuela babaen ti panagtunos dagiti mangisursuro ken dagiti  nagannak.

Innayon ni Mayor Ediboy nga iti kinaadu dagiti kameng a mangiturturong iti PTA-CNCS  ket ad-adu pay ti magapuananda ken  iti kinatimpuyogda ket dagiti kalikagumda iti Munisipio ket maikagumaanan a maited ti pannakabiangna para kadagiti programa ken proyekto iti  pagadalan.

Nagyaman dagiti Opisiales ken kameng ti PTA agraman dagiti mangisursuro iti agtultuloy a suporta ti Munisipio kadagiti pakaseknan ken kasapulanda ditoy a pagadalan. # (Web In-Action)

WATER PUMP, NAISAGUT KADAGITI 3 A KOOPERATIBA

Cabugao, Ilocos Sur – Naaramid ti pannakai-award ti tallo a water pump generator (diesel) kadagiti tallo nga asosasion ti Kooperatiba iti Cabugao, Ilocos Sur iti Opisina ti Mayor ket mismo a ni Mayor Edgardo “Ediboy” S. Cobangbang, Jr. ken dagiti mangibagi ti Sangguniang Bayan nga idauluan ni Vice Mayor DJ Savellano ti nangiyallawat kadagiti pannakabagi ti kooperatiba iti panagtagikua kadagiti nasao a makina idi Hulio 18, 2013.

Dagitoy a makina ket impaay ti Gobierno Probinsial babaen kada Governor Luis “Chavit” Singson ken ni  Vice Governor Deogracias Victor B. Savellano. 

Dagiti Kooperatiba a nabenepisiaran kadagitoy a naited a makina ket iti Free Farmers Multipurpose Cooperative, Inc. ti Brgy. Sagayaden; Arnap Sunrise MPCI ken  Turod Multipurpose Cooperative.

Dagitoy nga aksion ken inisiatiba ket gubuay ti nakammayet a pannakikaysa ti LGU-Cabugao nga idauluan ni Mayor Ediboy kadagiti asosasion ti mannalon/kooperatiba  ken kadagiti ahensia ken LGU’s a makatulong iti panangpasayaat iti kasasaad dagiti mannalon a mayoridad nga umili ti Cabugao, Ilocos Sur. # (Web In-Action)