Cabugao, Ilocos Sur – Nakikaysa ni Mayor Edgardo “Ediboy” S. Cobangbang, Jr. iti naangay a miting ti Cabugao Federated Farmer’s Association nga idauluan ni Mr. Elmer G. Bromeo, Federated President iti kabarbaro a Municipal Conference Building, Cabugao, Ilocos Sur idi Hulio 2, 2013.
Kangrunaan nga inikkan ti Ama ti Ili ti kaipapanan iti listaan dagiti kalikagum a gun-oden dagiti mannalon/asosasion ti Cabugao a saan pay a nakaala ti ramit ken makinaria tapno maikkan met ti panawen ti Munisipio a mangistudiar kadagitoy a pagkasapulan ket maisagana dagiti mausar a pang-counterpart ti LGU iti Department of Agriculture (DA) tapno magun-od dagitoy.
Impeksa pay ti Alkalde Munisipal iti napintas ita a turongen ti programa a mangpasayaat pay ti kasasaad dagiti mannalon ken mangngalap gapu iti manamnama a pannakaiburay dagiti mailungalong a proyekto a makiddaw manipud ken ni Gobernador Ryan Luis V. Singson.
Kinarit ni Mayor Ediboy dagiti lideres ti mannalon a pagtalinaedenda a natibker ken napintas ti rekord ti asosasionda tapno agtultuloy latta met ti talek dagiti maseknan nga Ahensia nga agited ti tulong ken proyekto.
Simmaruno a naangay ti meeting proper dagiti Opisiales ket trinatar-da dagiti pakaseknan/agenda ti Pederasion partikular iti panagrehistro ti amin nga asosasion iti DOLE. Imbinsa met ti MARO Office babaen ken ni Dr. Elizabeth Pablico, DPA, MARO Caretaker kasta met ken ni Municipal Agriculturist Zenaida S. Andrada dagiti baro a padamag-da para iti pagsayaatan dagiti mannalon. # (Web In-Action)
No comments:
Post a Comment