Cabugao, Ilocos Sur – Manarimaan manen ti panagklase ti Alternative Learning System (ALS) a paset ti Cabugao DepED District babaen iti panangtarawidwid ni Mobile Teacher Mr. Warren Sumibcay iti Cabugao South Central School, Brgy. Bonifacio, Cabugao, Ilocos Sur.
Ita a tawen 2013-2014, adda 75 a bilang ti nagrehistro nga agadal ti ALS. Iti Tawen 2012-2013 a panagklaseda, adda 70 a bilang ti nagbasa ngem 29 laeng ti bilang ti nakaturpos ti adalda. Umabot ti 10 a bulan ti panagbasada. Manamnama a makapagtuloyda iti Kolehio wenno Bokasional/Teknikal dagiti nagturpos ti High School Category idinto a makastrekda met iti sekundaria dagiti nagturpos iti elementary level ken masakupanda ida ti K to 12 Curriculum.
Ti ALS-Cabugao Center ket masarakan ti Opisinana ken pagklasean dagiti agad-adal iti Cabugao South Central School ket daytoy a benneg ti Edukasion ti mangsungsungbat ita ti pakaseknan dagiti drop-outs ken out-of school youths nga addaan ti agduduma a rason ti saanda a pannakatuloy a deretso ti panagadalda.
Mairamraman met latta a maikkan ti tulong babaen ti programa ti Edukasion ti ALS manipud iti Cabugao DepED District ken ti Gobierno Lokal ti ili a Cabugao, Ilocos Sur tapno maiturong dagitoy nga agtutubo a maserbian ti programa iti napintas a masakbayan ti panagbiagda ken agbalinda a produktibo a makipagili. # (Web In-Action)
No comments:
Post a Comment