Cabugao, Ilocos Sur – Nagatendar ni Mayor Edgardo “Ediboy” S. Cobangbang, Jr. babaen ti awis dagiti Barangay Nutrition Scholars (BNS) a timtimonan ni Mrs. Joenah G. Sevilleja, Municipal Nutrition Action Officer idi Hulio 2, 2013 iti Municipal Nutrition Action Office, Municipal Building, Cabugao, Ilocos Sur. Ti Ama ti Ili ti Chairman ti Municipal Nutrition Committee Council ti ili a Cabugao, Ilocos Sur.
Impalagip ni Mayor Ediboy ti napateg nga akem dagiti BNS a katinnulong ti barangay ken mangipatungpal kadagiti programa ti Munisipio pakaseknan ti Nutrision. Innayon ti Alkalde Munisipal nga isuda a BNS ti kakinnibin ti MSWDO ken Municipal Health Office (MHO) a mangyimplimentar iti programa ti nutrision ken salun-at kadagiti aw-away.
Nupay kasta, kalikaguman met ni Mayor Ediboy a tumulong kadagiti pakaseknan dagiti BNS babaen iti pannakisaritana kadagiti Kapitanes ti Barangay nangruna iti pannakaipasdek ti Barangay Health Clinic a pakaipanan dagiti ramit ti BNS ken BHW’s iti implementasion ti Nutrition Program iti kada barangay.
Imbatad ni Mayor Ediboy a saan a maited amin ti Munisipio ti kasapulan ken sungbat ti pakaseknan dagiti BNS ngem babaen iti natibker a panagtutunosda a mangilungalong iti pagsayataan daytoy a programa ti Munisipio, mapagballigianda ti amin a karit ken pakaseknan a tumaud iti hanayda. # (Web In-Action)
No comments:
Post a Comment