Cabugao, Ilocos Sur – Naaramid ti Farmer’s Field School (FFS) dagiti Farmer-Cooperators ti nagbuligan a proyekto ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken ti DA-RFU 1, San Fernando City, La Union idi Hulio 12, 2013 iti arubayan da Mr. Fermin Solis Sesuca, Presidente.
Agsipud ta naileppasen ti panagraepda iti 5,000 metro-kuadrado a Learning Field-da ket adalendan dagiti addang ti panagtalon a maisaguday iti Palay Check Session. Mairaman payen ti panangadalda iti panagraut ti peste ken insekto kadagiti mula ket trinatardan ti Agro-ecosystem Analysis wenno makunkuna nga AESA.
Nagsinnublat a naglektiur da Mr. Obas Bill Y. Baclig, AT ken ni Miss Kathryn Tapuro, AT, agpada nga naibaon babaen iti LGU-Cabugao a napan a nagadal iti kabaruanan a teknolohia (teoria ken aktual) idiay DA Provincial Center, Batac City, Ilocos Norte iti napalabas nga uppat a bulan.
Dagitoy nga aksion ken inisiatiba ket bunga iti napintas a panagkammayet ti DA-RFU 1, San Fernando City, La Union nga idauluan ni Regional Executive Director Dr. Valentino Perdido, Ph. D. ken ti LGU-Cabugao nga idauluan ni Mayor Ediboy tapno agtultuloy a ma-edukaran dagiti mannalon a maibilang a sanggir ti kagimongan iti ili a Cabugao, Ilocos Sur. (Web In-Action)
No comments:
Post a Comment