Cabugao, Ilocos Sur- Iti pannakiuman ti Web In-Action idi Hulio 15, 2013, imbatad ni Engr. Nestor B. Somera, pannakabagi ti Municipal Disaster Risk Reduction Management Council (MDRRMC), kangrunaan nga ipatpatungpalda ita ket ti pannakadalus, pannakakali dagiti Creeks iti Poblasion. Immuna a nawayaan ti Creek ti Brgy. Quezon manipud baba nga agpasurong tapno umannayas ti panagayus ti danum ken malapdan ti pagitlogan dagiti makadangran a lamok.
Maisaruno ti Creek ti Brgy. Bonifacio nupay regular a madaldalusan kadagiti kallabes nga aldaw babaen iti inisiatiba ti Konseho ti Barangay nga idauluan ni Brgy. Captain Valentin S. Tuyor ken ti puersa ti Clean and Green Program ti Munisipio nga idauluan ni MENRO Edgar S. Balangatan, AT.
Innayon ni Engr. Somera a manamnama a maileppas daytoy a rusat ti Munisipio babaen ti pannakausar ti back hoe. Kabayatan iti panangpasungad ti MDRRMC kadagiti kalamidad kas iti bagyo ken nakaro a tudtudo ket tumulong pay laeng a mangiwayat iti nasaknap a panag-clearing ken panagdaldalus iti aglawlaw ken kadanuman, innayon ni Engr. Somera.
Dagitoy nga aksion ken inisiatiba ket paset ti nasakbay a panagsagana para iti idadateng ti kalamidad ken saksakit nga ipagteng ti panagbaliw ti klima. Dagiti panagsagana ket maigannuat babaen iti panangitimon ti Gobierno Munisipal nga idauluan ni Mayor Edgardo “Ediboy” S. Cobangbang, Jr. kadagiti umisu nga addang a maiyimplimentar iti panangsalaknib kadagiti umili iti sakit ken didigra. # (Web In-Action)
No comments:
Post a Comment