Cabugao, Ilocos Sur – Iti pannaki-amad ti Web In-Action idi Hulio 4, 2013, imbatad ni Mr. Robert S. Savella, Municipal Plant and Nursery Coordinator a napintas ti pagbanagan ti patubo/maipalakay a seedlings iti nalaokan ti rice hull (napuoran a taep) iti naiselopin a daga a pagpatanoranda ti seedlings. Innayon ni Mr. Savella a narukruka ti daga a pagsaknapan ti ramut ken dam-eg ket nadardaras pay ti panagrusing ken panagungar dagiti maitukit a seedling .
Maysa kadagiti agit-ited ti carbonized rice hull iti Nursery ket iti nagaronan a taep ti BACALL MPA iti Flatbed Dryer-da babaen ken ni Mr. Dominador Reynold S. Sabio, Presidente. Segun ken ni Mr. Sabio, ur-urnongenda dagiti nagaronanda a taep ta maibilbilang met a nakalidad ti usarna nangruna iti panagbunubon ti pagay dagitoy a by-product.
Insupusop ni Mr. Savella a mabalin nga usaren daytoy a wagas tapno mapapardas ti panagpatubo ti seedlings a kayatda a maipatulad kadagiti Nurseries ti barangay ken eskuela.
Kabayatanna, impakaammo ni Mr. Savella iti sapasap babaen iti MENRO iti nasaknap koma a panagpatubo ti seedlings kadagiti Nurseries-da tapno saan a makamat ti suplay ti Municipal Nursery ket adda latta madadaan a reserba a seedlings no adda dagiti nasken a pagkasapulan ti Munisipio ken agkiddaw nga indibidual wenno grupo iti imulada. # (Web Situational Report)
No comments:
Post a Comment