Cabugao, Ilocos Sur – Immawat dagiti pito a nabiktima ti saan a nasayat a pannakatratoda a nagobra iti ballasiw-taaw iti tulong a pakabuklan ti sag-P10,000 a nai-tseke a gatad babaen iti Recovery and Reintegration Program ti Department of Social Welfare and Development, Regional Office No. 1 ken kakammayetna ti Gobierno Lokal ti ili a Cabugao, Ilocos Sur nga idauluan ni Mayor Edgardo “Ediboy” S. Cobangbang, Jr. Naaramid ti awarding ken MOA Signing iti Opisina ti Mayor idi Hulio 4, 2013.
Mismo a naiyawat dagiti Tseke dagiti maseknan a matulongan babaen ken ni Mayor Ediboy agraman dagiti pannakabagi ti DSWD Region 1 iti imatang dagiti kameng ti Sangguniang Bayan nga idauluan ni Vice Mayor DJ Savellano.
Daytoy a tulong ti Gobierno kadagiti nabiktima ti Human Trafficking ken kaarngina a pannakaabuso ket maipaay a pagpuonanda iti livelihood projects a pangrugianda a bumangon ti panagbiagda.
Kanaig daytoy, nagpirma ni Mayor Ediboy ken ti pannakabagi ti DSWD Region 1 iti Memorandum of Agreement (MOA) a nangisaguday ti pannakaited ti serbisio kadagiti trafficked persons ken pannakai-transfer ti pundo manipud iti DSWD Region 1 iti LGU-Cabugao para kadagitoy a recipients ti nasao a programa.
Nakikaysa met iti nasao a MOA Signing da SB Member Dr. Carlito S. Pano, Committee Chair on Social Services, MSWD Officer Mrs. Lydia S. Gazmen, SBM Danny Q. Gazmen, SBM Dr. Jemaima S. Tan-Yee, SBM Benedicto M. Savellano agraman dagiti pannakabagi ti DSWD Region 1 ken MSWDO-Cabugao. # (Web In-Action)
No comments:
Post a Comment