Cabugao, Ilocos Sur – Iti pannaki-amad ti Web In-Action kadagiti Opisiales ti Cabugao Livestock Traders Association nga idauluan ni Mr. Marciano Raciles, Presidente idi Hulio 6, 2013, impakaammoda nga ikagkagumaananda a mapagwanas ken agtulid ti puonan kadagiti bumulod a Koridor ken Miembro ti Asosasion tapno maparegget pay ti transaksion a mapasamak iti Dayo.
Iti kaaldawan ti Dayo idi Hulio 6, 2013, nabun-as ken nalasbang dagiti nuang ken baka a nai-dayo ta rimmegta dagiti trakan a mangipasirpat kadagiti ayup-da a maipakpakita pay iti dadduma a lugar a paki-dayoanda.
Iti pannakasustener ti operasion ti Dayo, mangnamnama dagiti Opisiales ken Miembros ti asosasion a dumakkel ti maaramid a transaksion ken manayonan ti puonanda tapno umad-adu ti magatangda ken mailakoda nga ayup a mangpasayaat met ti indibidual a kasasaadda ken iti masapulan ti asosasion a mangipaay iti pagsayaatanda a kamkameng.
Ti aksion ken inisiatiba ket gubuay ti napintek a programa iti benneg ti Livestock iti Agrikultura babaen iti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno maikkan ti pannakataming ti panagpatan-ay ken iti merkado dagiti dinguen ken animales a mangnayon pay ti masapulan dagiti mannalon ken agduyos iti panagtartaraken. # (Web In-Action)
No comments:
Post a Comment