Cabugao, Ilocos Sur – Naangay ti umuna a panagklase dagiti 26 a Farmer-Enrollees iti Farmers Field School (FFS) ti Dardarat Farmer’s Association nga idauluan ni Mr. Fermin Solis Sesuca, Presidente idi Hulo 5, 2013 iti Brgy. Dardarat, Cabugao, Ilocos Sur.
Tinarawidwidan dagiti pannakabagi ti DA-LGU nga idauluan ni Municipal Agriculturist Zenaida S. Andrada ti nagsasaruno a naited a leksion ti naballigi a panagtalon kadagiti mannalon.
Naaramid a lima a grupo dagiti nagatendar ken napili dagiti lider ti grupoda tapno naannayas ti pannakaiwardas ti aramidenda nangruna no mapandanto agobserbar iti Learning Field-da iti pagtatalonanda iti Brgy. Dardarat.
Manamnama a maileppas dagitoy nga agadal a mannalon iti 16 a lawas a panagbasada iti kabaruanan a teknolohia ti panagpatanor ti pagay ken panangtaming kadagiti insekto ken peste ti mula a pagay babaen iti nain-gayyeman ken maka-aglawlaw (eco-friendly) a pannakatratar-da tapno matun-oyan ti panggep ti proyekto a nagbuligan a maipatungpal babaen iti DA-RFU 1 ken LGU-Cabugao ita a Wet Season 2013 (Hunio-Nobiembre). # (Web In-Action)
No comments:
Post a Comment