INTER-AGENCY A SERBISIO, MAISAKNAP

Cabugao, Ilocos Sur – Impakaammo ni Mayor Edgardo “Ediboy” S. Cobangbang, Jr. iti imatang ti Pamilia-LGU ken  Personnel ti  dadduma nga Ahensia  kalpasan ti Flag Raising Ceremony idi Hulio 8, 2013 iti sango ti Munisipio iti panagtitinnulong koma dagiti maseknan nga Ahensia partikular ti Rural Health Unit (RHU)-DOH Personnel iti Municipal Health Office a mapanda iti aw-away a sumurnad  kadagiti lumugar a  nangruna kadagiti disso a pagrarairaan ti  sakit a  dengue iti agdama.

Imbatad ni Mayor Ediboy a maysa dagitoy a pakaseknan ita dagiti lumugar iti barangay ken uray pay ti Poblasion iti pannakasalaknibda nangruna dagiti ubbing iti pannakailisida ti sakit a parnuayen ti agdangran a lamok.

Malaksid dagiti dadduma a pakaseknan dagiti umili a kalikagumanda a maaksionan ken matarabay, kalikaguman ni Mayor Ediboy a maidanon dagiti mayataday a serbisio babaen kadagiti Opisina ti LGU ken Ahensia a nakasalinong iti Gobierno Lokal kadagiti aw-away ken lumugar iti barangay tapno maiparikna ken maipaay iti madagdagus a pannakasaranay dagitoy nga agkasapulan nga umili nangruna iti panawen ti kalamidad.

Binilin pay ti Ama ti Ili ti mangbukel ti puersa ti Municipal Disaster Risk Reduction and Management  Council (MDRRMC) a tingitingenda dagiti maitutop a kasapulan ken aksion a maipaay iti  panangpasungad ken panawen  ti kalamidad ken emerhensia para kadagiti umili.

Kabayatanna, impakaammo met ni Fire Marshall Elmer Acapuyan ti Bureau of Fire Safety ti Munisipio nga ita a bulan ti Hulio ket naibayog a National Disaster Conciousness Month ket imbinsana dagiti tips ken laglagipen nga aramiden tapno malapdan ti uram iti pagtaengan ken establisimiento. Kangrunaan a dinakamatna ti nainsiriban a panagusar ti silaw a kandela aglalo no brownout  ken panangliklik ti agsusukot iti saksakan ti koriente.

Kalikaguman pay ti Alkalde Munisipal ti sangsangkamaysa ken naan-anay a  panangipatungpal kadagiti pagrebbengan ken serbisio ti tunggal agserserbi iti Munisipio ken addaan ti akem para iti sapasap nga umili a maiserbian tapno agtultuloy latta a  napintas ti  sangkailian a kasasaad. # (Web In-Action)