Friday, July 12, 2013

NAKASAGANA TI MDRRMC KONTRA TI KALAMIDAD

Cabugao, Ilocos Sur – Apaman a naipaulog ti Direktiba ni Mayor Edgardo “Ediboy” S. Cobangbang, Jr. iti panagkakammayet dagiti maseknan nga Opisina ken Ahensia iti salinong ti LGU-Cabugao a mangaksion kadagiti  didigra ti sakit ken  mapaspasangasangan a kalamidad/ emerhensia   a kaaduanna a tumaud ita a bulan, nagtignay ti puersa ti Municipal Disaster Risk Reduction  and Management Council (MDRRMC)  nga ibagian  da Engr. Nestor B. Somera ken Engr. Crescencio C. Formoso a nangimbentario kadagiti kasapulan ket magatang dagitoy tapno nakasagana a mausarda no dumteng ti kalamidad. Kasta met iti papanda kadagiti calamity prone areas (inland ken coastal area)  tapno mamakdaarda ken maaramid ti information drive kadagiti pagmimitingan ti tao iti barangay ken poblasion.

Daytoy a panagsagana ket naibasar  iti pannakaibayog ti pannakaobserbar ti “National Disaster Consciousness Month”  ita a bulan ti Hulio 2013 a panangpasungad ti isasangbay dagiti kalamidad kas iti bagyo, nakaro a tudtudo, layus,  uram ken kanaigna a didigra.

Iti pannakiuman ti Web In-Action idi Hulio 11, 2013, imbatad ni Engr. Nestor B. Somera a malaksid iti panangalertoda kadagiti kakaduada a mangbukel ti MDRRMC iti Munisipio nga agmobilisar/monitor  manipud iti aw-away agingga iti Poblasion, naidagadag pay ti pannaka-dredge (mawayaan)  dagiti Creeks iti Poblasion tapno nasayud ti panaglusot ti bagi ti danum nga aggapu iti surong no katudona.

Innayon pay ni Engr. Somera nga aramidenda ti naan-anay a pannaki-koordinar kadagiti dadduma  a Departamento ti Opisina ti LGU a maseknan no dumteng ti kalamidad  tapno naan-annayas ti panagrespondeda a mangaksion kadagiti pakaseknan dagiti umili.

Dagitoy nga aksion ken inisiatiba ket gubuayen ti napartak a panangipatungpal ti pagrebbengan iti panawen ti emerhensia tapno maprotektaran dagiti umili babaen iti panangikalikagum ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno mapakadaan ken maalay-ayan  ti epekto dagiti dumteng a kalamidad no adda man. # (Web In-Action)

No comments:

Post a Comment