Cabugao, Ilocos Sur – Naangay ti Family Development Session (FDS) ti Pantawid Pamilyang Pilipino Program (4 P’s) ti Brgy. Quezon ken Brgy. Bonifacio, Cabugao, Ilocos Sur idi Hulio 8, 2013 iti Municipal Conference Building, Cabugao, Ilocos Sur.
Dimmar-ay dagiti inna ken amma a mangibagi kadagiti pamilia a kameng ti 4 P’s. Masansanen ti panag-session dagiti 4 P’s agsipud ta kalikaguman dagiti mangiturturong a matun-oyan ti programa dagiti maipatungpal a pagrebbenganda iti umisu a panawen. Addan ti maika-5 a tawen ti umuna a bansada ti Conditional Cash Transfer Phase ti 4 P’s ket kalaksidan ti health care and education, masursuruan pay dagiti kameng a makigamulo iti komunidad kas iti pannakaited ti seedlings nga imulada, pannakasanayda nga ag-backyard gardening ken kanaigna a napapateg nga aktibidades a mangnayon pay ti pagbiagan dagitoy a marigrigat a pamilia.
Naglektiur da Miss Aida S. Cueto, Municipal Link & Focal Person kasta met ken ni Ms. Jessie Ann O. Tabut, Municipal Link Staff ti MSWDO-Cabugao ket trinatarda dagiti pakaseknan dagiti nagatendar ken agraman ti pannakadisiplina dagiti maiwawa a kameng.
Dagitoy nga aksion ken inisiatiba ket gubuay ti nasaknap a pannakaipakat ti programa a pangsappuyot kadagiti marigrigat a pamilia babaen iti pannakikammayet ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti DSWD a kangrunaan nga Ahensia a mangipatungpal kadaytoy a programa a mangtultulong kadagiti napanglaw a pamilia ti kagimongan. # (Web In-Action)
No comments:
Post a Comment