NABUSLON A TUDTUDO, NALAWLAWA A MATALON

Cabugao, Ilocos Sur – Iti panakaisar-ong ti Web In-Action kadagiti barangay ti Munisipalidad, naammuan kadagiti mannalon nga iti panagbuslon ti tudo ti kangrunaan a pagbatayanda ti panagplanoda ti panagtalonda  iti  Wet Season 2013 (Hunio-Nobiembre). Naammuan pay a kaaduan ita ti manam-ayan iti kaadda ti naited kadakuada a libre a  ganagan (Ammonium Sulfate ken Organic)  babaen iti Gobierno Munisipal a nausar iti panagbunubonda ken anayanda metten a mausar iti panangpadakkeldanto  ti maitukitda a raep.

Maibasar iti tignay ken serbisio ti DA-LGU maipapan iti daytoy a panagtatalon, imbatad ni Municipal Rice Program Coordinator Nereo S. Daproza  a kaaduanen iti umabot iti 4,300 a mannalon a mangbukel kadagiti  rehistrado nga  asosasion ti mannalon iti naikkan ti pamalpalatpatan iti Cropping Calendar & Pattern of Planting iti Wet Season 2013 babaen iti naaramid a meeting ken Technical Briefing ti Palay Check Session.

Nupay kasta, kaaduan a mannalon ti agpannuray ti buslon ti tudo iti eskediul ti panagtalonda kadagiti 1, 283 ektarias a rainfed area ken naituding met  dagiti eskediul-da  kadagiti masakupan ti irigasion   nga umabot ti 971 ektarias a mataltalon.

Innayon ni Mr. Daproza a manamnama a matalon ita ti ag-2,204 ektarias  a dati a mataltalon iti intero a Munisipalidad. Kanaig daytoy, nailunsaden dagiti Municipal Techno-Demo Farms iti Sitio Gapang, Brgy. Catucdaan,  Barangay Sisim, Brgy. Sagayaden Norte, Brgy. Nagsantaan ken  kasta metten ti Farmer’s Field School (FFS)  in Rice Production sadiay Brgy. Dardarat ken Brgy. Reppa-ac-Pug-os a nagpartisiparan ti 70 a mannalon. Dagitoy a demonstration area ti panagtalon ket tinawen a maar-aramid iti kada strategic areas a pagtuladan dagiti mannalon.

Iti agdama, mapatta-patta nga addan 150 ektarias a naraepan manipud bulan ti Mayo-Hulio 2013 . Manamnama a makalpas ti amin ti panagtalonda iti umuna a lawas ti Agosto 2013.

Insupusop pay ni Mr. Daproza a manam-ayan dagiti mannalon ita a panagtatalon ta tunggal asosasion ket naikkanda  ti pagsusublatanda a ramit a pagtalon kas iti tractor, kuliglig, hose ken makina a pagpakunot ti danum babaen ti panangpataud  ti DA-RFU 1 ken LGU-Cabugao kadagitoy a pagimbagan dagiti mannalon.

 Dagitoy nga aksion ken inisiatiba ket gubuay ti napintek a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno makomplementaran ti regta dagiti mannalon nga agpataud ti umanay a suplay a pagtaraon dagiti umili ken manaynayonan ti masapulanda agsipud ta mayoridad dagiti umili ti agdepende pay laeng  iti kangrunaan a  pagbiaganda iti Agrikultura. # (Web Situational Report)